2564/2024-2025

Dated Serchhip, the 17^th October, 2024: Vawiin khan Serchhip DC Pisapui Hall-ah, Serchhip DC Pu Paul L Khuma chuan Mizoram State Cooperative Union, Serchhip Branch a hawng. Serchhipa MSCU Branch hawn tak hi Mizoram District-a branch ding hmasa ber a ni.

DC chuan Mizoram State Cooperative Union, Serchhip Branch hawn a ni ta chu lawmawm a tih thu a sawi a. Cooperative Society hrang hrang te khai tu tur MSCU hruaitu thar te chu society ding mek te leh lo la ding tur te tan an pawimawh a; an kalphung leh kal dan khalh ngiltu, society hrang hrang te chawikangtu an nih a ngai dawn a ni, a ti. Hruaituten an thut chhan an hriat a tul a, nihna an neih chhan an hriat loh chuan hmasawn loin kal ngaihna hre loin a awm theih a ni, DC chuan a ti a. An hmalakna puanzar tam te, hnathawh leh hmalakna endik (monitoring) te, thutlukna an siam dawnin midangte ngaihdan ngaihthlak a pawimawh thu te sawiin society te leh district hmasawnna turin inngaihtlawmna nen hruaitu tha nih tum turin Pu Paul L Khuma chuan MSCU Serchhip Branch hruaitu thar te a fuih a ni.

Pu K Lalduhawma, CEO, MSCU chuan Serchhip MSCU hruaitu thar puanna hun a hmang a. Ex Officio Director ah Pi L Lalzidingi, District Cooperative Officer; President ah Pu H Vanlalhruaia, Chairman, Serchhip Consumer C/S Ltd.; Vice President Pu R Lianchhawna, Treasurer, Khawlailung Consumer C/S Ltd.; Member Secretary Pi Miriam Lalramdinpuii, Cooperative Audit Officer, Serchhip. Board of Directors te - Pu Lalliana Sailo, Secretary, Baktawng Farming C/S Ltd.; Pu Laltlana, Vice Chairman, Keitum Farming C/S Ltd.; Pu PC Laldinpuia, Member, Serchhip Farming C/S Ltd. te an ni.

District a MSCU Branch hawn leh din chungchang hi July 19, 2024 khan rel niin Registrar of Cooperative Society chuan a pawm a. District a branch ding hmasa ber ni turin Serchhip District MSCU hi a lo piang ta a, District dangah pawh MSCU Branch te hi hawn zel tum a ni.

Mizoram State Cooperative Union hi kum 1975 ah a ding tan a. A dinchhan leh tum ber chu Mizoramah Cooperative movement hmasawnna leh chakna tur te, cooperative society a tel te leh a ngaihven tute zirtir leh training pek te a ni a. Sum leh pai an hmuh ang zelin a din tirh atanga vawiin thlengin hmun hrang hrangah training an buatsaih thin a. Kumin chhungah pawh training hi vawi 27 an nei tawh a, Mizoram Sawrkar flagship program Banakaih (Handholding) Scheme ah pawh a tangkai hle tura beisei a ni.

Serchhip Branch MSCU hawnna inkhawm hi Pu K.Lalchamreia, President, MSCU chuan a kaihruai a. Serchhip District chhung hmun hrang hranga Co-operative Union hruaitute leh member te; MSCU Board of Directors te; MAHFED, MAHCO leh MULCO Chairman te; Federation leh Society hrang hrang aiawh te leh Co-operation Department hotute an tel a ni. Pu Robuanga, Addl. RCS chuan Serchhip MSCU hruaitu tharte fuihna thu a sawi a. Mizoram State Cooperative Union Board of Directors zinga mi Pu Zailianthanga chuan lawmthu sawiin hun hnung a khar a ni.