Kolasib district a pawikhawihna a thlen tlem nan leh venhimna khauh zawk a kalpui theih nan a thawhho dan tur sawiin District Security Meet vawiin khan District bawrhsap Dr.Arun T hovin DC Conference Hall, Kolasib-ah neih a ni.
Meetingah hian dan bawhchhiatna leh pawikhawihna hrang hrang thleng thin chungchang te sawiho a ni a, heng rukruk, pawngsual, tualthah, inruk leh ruihhlo do chungchangah hmalakna tur hrang hrang te sawiho a ni a. Heng dan bawhchhiatna leh pawikhawihna tih tlem kawnga hmalakna ah sorkar official te leh khawtlang hruaitute tanho a tul thu meetingah sawi a ni a.
Meetingah hian sipai leh police uniform hnathawh nan emaw inchei nana hmanglo turin mipuite ngen an ni a. Thil ru tu bakah thilruk lo lei tu te chu a ru tu ang tho a hrem ve theih an nih avangin fimkhur tur leh thilruk sa lei lo turin mipuite ngen an ni a. Heng chungchang te hi mahni veng mipuite hrilhhre fo thin turin khawtlang hruaitute ngen an ni.
Inner Line Permit pekchhuah kawngah pawh, pekchhuahna hmun Bairabi leh Vairengte ah te thawktu te felfai taka lehkha vawng turin meetingah hian hrilh an ni a. Hei bakah hian Kolasib chu National Highway 54 in a tan tlang avangin motor chetsualna lakah pawh fimkhur a tul thu te sawiho a ni.
Kolasibah Police te leh khawtlang hruaitute thawhhona tha neih avanga Kolasib a pawikhawihtu te chungthu ngaihtuah thuai theih thin a nih thu sawiin, conviction rate a tha hle a ni tih meetingah hian tarlan a ni a. Meeting hi thlathum dana neih zel tur a ni ang. Vawiin meetingah hian District a official te bakah Village Council member te leh YMA hruaitute an tel a ni.
