2488/2022-2023
Kolasib dated 31st October 2022: Vawiin khan DC Conference Hall, Kolasibah District AIDS Prevention & Control Committee, Kolasib chuan thutkhawmna neiin Kolasib district-a HIV kai dinhmun thlirletna leh HIV/AIDS chungchang inzirtirna neih nghal a ni a. Pu John LT Sanga, Deputy Commissioner chuan hun kaihruaiin HIV lak a mizo thalai kan him theih nana beihpui thlakna ‘Zoram Harh rawh Campaign’ chu November ni 24-ah neih tur a rel a ni.

Vawiin thutkhawma tarlan danin June 2002 atanga September 2022 thleng hian Kolasib district chhung a thisen 84,519 endik tawh ah mi 1,683 chu HIV hrik kai an nih thu sawi a ni a. Heng zinga za zela 56 chu mipat hmeichhiatna hmanna atanga kai an ni a, za zela 38 chu inchiuna thianghlim lo hman atangte leh za zela 3 chu nu naipai atanga inkai an nih thu tarlan a ni.

Kolasib district chu AIDS vei tamna (High Prevalence) district zingah a tel mek thu leh State luhka pawimawh tak a nih angin HIV hrik darh zel tur ven chu ngaih pawimawh a tul thu sawi a ni a. Hemi tihlawhtling tur chuan Sawrkar hnuai a department hrang hrangte leh Kohhran, khawtlang leh tlawmngai pawlten thawhhona tha tak an neih a pawimawh thu sawi a ni bawk. AIDS/HIV chungchang inzirtirna chu zirlai naupangte hnen ah uar zawk a kalpui dan tur te, Kohhran thalai zinga inhrilhhriatna tha zawk buatsaih dan turte sawi ho a ni a, ‘Zoram Harh Rawh Campaign’ kaltlanga Kolasib district thalai tam zawk ten HIV/AIDS lak a inven nachang leh nun kawng dik an zawh theih nana hmalak dan tur te sawi ho a ni bawk.

Pu Lalbiakzuala, DPM, DAPCU chuan Kolasib district chhunga HIV vei te dinhmun tarlanna hun a hmang a Dr. Robert Lalrempuia, SPO-PATH, MSACS chuan AIDS/HIV inkai darh dan te, a hri vei enkawlna kalpui dan te leh Sawrkawr leh NGO tangkawp a nasa zawk a hmalak a ngaih thu te a sawi bawk a ni.