2487/2022-2023
Aizawl, the 31st October 2022: Sawrkar laipui flagship programme kalpui mekah India ram puma Electric eng chhit man chawi dan tur hi pek lawk (Pre-paid system-a) theiha leh vek tura ruahman a ni a. Chutiang chuan Mizoram chhunga Consumer meter zawng zawng pawh hi Pre-paid Smart Meter-a thlak vek tura a hma lak chhoh mek a ni. RDSS Part-B hnuaiah hian Training a awm a, hei hi Ministry of Power funding tur a ni a. He training hi vawiin khan Department hnathawkte mi 30 hnenah training pek an ni a. He hunah hian Er. David Ramnunsanga Chief Engineer (RE) chu khuallian a ni.
Internet Service provider eg. Jio, Aitel etc. te ang deuh hian DBFOOT (Design Build Finance Operate Own and Transfer) model hmangin Advance Metering Infrastructure Service Provider (AMI-SP) pakhat Department-in a ruai dawn a. Anni hian Pre-Paid-a kan electric eng chhit man kan top -up mai theihna tura thil tul zawng zawng an ngaihtuah vek ang. Top-up na tur hian sawrkar laipui chuan a thlawna hman tur Mobile apps a siam tawh a, he apps atang hian kan bill pek dan leh balance te mahni awm hmunah a en theih mai tawh dawn a ni.
Hna hautak tak a nih avangin AMI-SP hian hna an thawh zawh hnua hian kum 10 chhung vel an enkawl chhunzawm bawk dawn a ni.
Smart Meter prepaid mode kan kalpui theih hunah chuan -
i) Meter reading lak atanga bill siam tlengin mihring an inrawlh tawh dawn loh avangin bill siam sual lakah thui tak min veng thei ang.
ii) Mobile apps hmangin electric eng kan chhit man pek lawk tawh tur a ni dawn a, electric bill chhut chhuahna atan tha leh sum sen a ngai tawh lovang a, Sub-Division bill counter-te hi electric bill dawn nan bik chuan hman zui a ngai tawh lo bawk ang.
Smart Meter kan hman hunah chuan control centre atangin meter disconnect leh re-connect a tih theih tawh dawn a, bill ba chu chawp leh chilhin a hmuna kal kher ngai lovin tih thim nghaltheih an ni dawn a ni. Chutih rual erawh chuan consumer-in a hman tawk te te in a eng chhit man zat tur thla khawtah vawi 2 emaw vawi 3 te pawh a top-up thei tawh dawn a, thla tawpa a hlawm a pek tawk kha awm tawh dawn lo a ni.
Pre-paid Smart Meter hman tur chungchanga mipui (consumer)-ten kan hriattur pawimawhte a hnuaiah hian tar Ian a ni e:
1) Pre-Paid Smart Meter hian communication atan wireless a hman dawn avangin kan meter dahnate hmun ualau deuh a ngai tawh dawn a, hmun biru leh signal hmuh that theih lohnaa meter dahnate chu hmun ualau zawka dah a nih dawn avangin Department hmalakna tha taka min lo tawiawm turin mipuite kan ngen e.
2) Post-Paid atanga Pre-Paid-ah insawn a ngaih dawn avangin nakinah harsatna kan tawh loh nan electric bill ba te lo pe fel zel turin leh contracted load te pawh eng kan chhit tarn lai ber ang mila lo in update turin kan inngen e.
3) Consumer thar, Application theh lut tawh la tifel loh emaw bill dawng lo emaw te pawhin office lamah a rang lama chinfel a nih theih nan bawhzui turin kan inngen e.
4) Pre-Paid Smart Meter hi hlawhtling taka hman a nih theih nan Power & Electricity Department chuan hriattirna chi hrang hrangte la tihchhuah a turn a. Hengte hi lo ngaihvena theih tawpa Department hmalakna lo tawiawma min lo thawhpui turin mipuite kan ngen a ni e.
Training hi Er. Lalnithanga, Superintending Engineer (Works-ll) Nodal officer chuan a kaihruai a. Hemi hma hian mi 30 tan training hi buatsaih a lo ni tawh bawk. Training hi National Power Training Institute (NPTI)-in an rawn buatsaih a ni.
