2489/2022-2023
Aizawl the 31st  October 2022 : Tukin zing dár 7:00 khan Mizoram Sawrkar Vigilance Deptt. leh Central YMA te hmalaknain Vigilance Awareness Week 2022 hawn nan Walkathon buatsaih a ni a. Aizawl khawpui chhunga Branch YMA tin atangin mi 3 zel an kal khawm a. Sikulpuikawn atanga Branch YMA 40 aiawh kalkhawm te chu Pu Lalsanglura, SP, ACB in a vai liam a. Chanmari kawn atanga Branch YMA 68 aiawhte chu Pu Laldingluaia, Director, Vigilance Deptt- in a vailiam bawk a ni.

Hmun hnih atanga Walkathona kalte hi Vanapa Hall kawtah intawk khawmin hetah hian hun hman chhunzawm a ni a. Pu Lalhmachhuana, Vice President Central YMA in a kaihruai a ni.

Vanapa Hall kawt-a kalkhawmte hmaah thu sawiin Pu R. Lalngheta, President Central YMA chuan ram leh hnam hmelma hlemhletna hi mimala do hneh chi a ni lo va, ram mipuiten tangruala do chi a ni, a ti a. Mizoram Sawrkarin Central atanga a sum dâwn te diktak leh fel takin a hmanna tur dik takah hman ni se tih hi mipui duh dan a ni, a ti a. Mizoram Police-te chu India Ram Police-te zingah Conviction nei sang ber an ni, tiin Pu Lalngheta chuan ACB in corruption case an chhui atangin kum 2022 chhungin case 3-ah conviction an awm tawh chu lawmawm a ti a. Chutih rualin CBI ten Mizorama an hnu chhuiah conviction an neih thu hriat a la ni chiah lo chu nasa zawkin tan min lak sak se tiin kan chah a ni, a ti a. Central Sawrkar thu angin corruption do turin Lokayukta din a ni hi a lawmawm em em a, hnathawk tak tak thei turin Sawrkar hian thuam chakin member tha tak tak ruat thuai se a tih thu a sawi bawk a ni.

Hemi hunah hian Mizoram State Chief Vigilance Officer leh Mizoram State Chief Secretary ni bawk Pi Renu Sharma IAS pawhin telpuiin thu a sawi a. Pu Lalhriatpuia, Addl. Secretary, Vigilance Deptt. in kalkhawmte thutiam (Pledge) a sawi rual tir a. Pi Lal Muanpuii, Under Secretary Vigilance Deptt chuan lawmthu sawina hun a hmang bawk a ni.