3400/2022-2023

Champhai, the 28th January, 2023: Champhai District Bawrhsap Pu James Lalrinchhana chuan vawiin chawhnu dar 3 khan Pollution Testing Centre, Champhai chu RD Pump, Ramhrangkawn, New Champhaiah a hawng.

Pu James Lalrinchhana chuan Transport Department hnuaia bungthar pawimawh tak Champhaiin a kai chu lawmawm a tih thu a sawi a. Pollution Under Control Certificate pek chhuah theihna hmun hawn a ni ta chu district tana mellung pawimawh tak anih thu sawiin, hmasawnna te lua a awm lova, hmasawnna dawnsawn dan erawh kan thiam a tul a ni, a ti. Tumah dan chunga leng an awm loh avangin dan leh hraite zawm theuh turin district mipuite a sawm a. Lirthei khalhtute chu mawhphurhna an neihte hriaa himna tura pawimawhte zawm fo tur leh, fimkhur leh hawihhawm taka lirthei khalh thin turtein a chah a. Dan kengkawhtute hmuh phak lova dan palzutna thleng thin chu him tlan zawk nan sim a tul thu sawiin, mahni theuh dan kengkawha zawmtu anga inngaia kan nun kan hman a ngai a ni, a ti bawk.

District Bawrhsap chuan lirthei khalh chu thiamna ngai, hna zahawm tak mite tana rawngbawlna anih thu sawiin, dan zawm loh leh fimkhur tawk loh avanga midangte tana chhiatna thlen thin chuan hna zahawmna a ti bo thei a, fimkhur tlan a ngai hle a ni, a ti a. District chhunga lirthei khalhtute chu Pollution Certificate nei theuh tura chahin, midangte hnena zau zawka thehdarh zel turin district mipuite a chah a. Kan himna tur leh boruak a lo thianghlim zawkna tura Sawrkar hmalakna hi tha takin kan thlawp a ngai a ni, a ti bawk a. Pollution Testing Centre Champhai enkawltute chu theihtawp chhuah tura chahin, Champhai District mipuiten te'n tangkai taka an hman theih nana duhsakna hlanin Pollution Testing Centre Champhai chu a hawng a ni.

Thusawitu dang Pu Lalrinpuia Varte, SP Champhai chuan Pollution Certificate neilote dapchhuah leh hremna pek kawngah dan tlawhchhana hmalak tum anih thu leh, Sawrkarin a ngaipawimawh avangin hremna pawh na tak pek theih anih thu a sawi a. Pollution test chuan lirthei himna leh hriselna lam thlenga a nghawng theih avangin kan zavaia ngaih pawimawh tlan a tul tawh hle a ni, a ti bawk a. Pollution Certificate chu neih har lo leh man tam lo taka tih theih, tih loh chuan hremna na tak tawh theihna anih thu sawiin, lirthei neitute chu Pollution Certificate nei tura tan la theuh turin a chah a ni.

Pi R. Lalnunkimi, DTO Champhai hnen atangin Pollution Testing Centre chungchang leh technical report ngaihthlak a ni a. Transport Minister leh Champhai South bialtu MLA hmalaknaa Pollution Testing Centre Champhai hawn theiha peihfel a ni chu lawmawm a tih thu a sawi a. Lirthei neitute chu dan leh thupek tha taka zawm a, a hun taka document leh certificate tihnun thar ngaite DTO Office-a tifel zung zung thin turin a ngen a. Transport Department hnuaia Enforcement Staff-te khauh lehzuala an duty thin tawh dawn avangin lirthei neitute pawh a tul ang angte tifela lo inbuatsaih lawk theuh turin a chah nghal bawk.

He hun hi Authorised Pollution Testing Centre Champhai atana thlan RD Pump Owner Pu C.Vanlalhmuaka chuan kaihruaiin kalkhawmte lawmna thu a sawi a. Pu Lalnunmawia'n hunserh a hmang a. Pollution Testing Centre Champhai hawnna puala hun hman hi Pu Lalmakthanga'n lawmthu sawiin a khar a ni.

Dilna hawna zirchianna neih anih hnuah Mizoram Sawkar chuan RD Pump, New Champhai chu December ni 19, 2022 khan Pollution Testing Centre atan a thlang a. A thlanna Letter of Award (LOA) ah kalphung leh inkaihhruaina zawm tur felfai tak ziah a ni a, Pollution Testing Centre, Champhai enkawl dan turah hian Build, Own, Operate (BOO) behchhana inremna siam niin, hemi atan hian kum 2 chhung atana thawhdunna thuthlung (MoU) ziah a ni.

Transport Department Champhai chuan lirthei khu endikna khawl Smoke Emission Analyser Petrol Engine leh Diesel Engine pakhat ve ve, Computer set leh tul dang an kawllaite chu Authorised Testing Centre atana ruat tak RD Filling Station kutah hian a hlan chhawng a, a enkawl zui leh tul ang buaipui chu an kutah a awm tawh dawn a ni. Rokhawlhna engemaw thleng avanga pollution test kalpui theih tawh loh anih chuan hmanruate department kutah hlan let leh nghal tur a ni ang.

Pollution Test kalpui dan kimchang record hi felfai taka vawn zel tur niin, test fee pawh Sawkar dan dinglai rate ang zela lak tur a ni a, DTO ah thla tin ni 10 ral hmain Sawkar chanpual angte chhunluh thin tur a ni. Pollution Test paltlang ngeite chauh certificate pek chhuah tur a ni a, test result-te hi VAGAN Portal-ah dahluh zel tur niin, Pathianni tiam lohin nitin Pollution Testing Centre hi hawn tur a ni ang. Thla thum dan apiangin DTO in Pollution Testing Centre endikna a nei thin dawn a, enfiahna report kimchang Director, Transport Department-ah a thehlut thin dawn a ni.

December ni 7, 2022 a Mizoram Sawrkarin Vehicular Emission Testing Fee a ennawn angin Champhaiah pawh hetiang hian Pollution test  fee lak a ni:
1) 2 Wheeler - Rs 60/-
2) 3 Wheeler (Petrol Engine) - Rs 80/-
3) 3 Wheeler (Diesel Engine) - Rs 100/-
4) LMV (Petrol Engine) - Rs 120/-
5) LMV (Diesel Engine) - Rs 150/-
6) MMV & HMV - Rs 200/-

Pollution Certificate neilote hi MV Act Section 190 Sub-section 2 hmangin thla thum lungin tan tir emaw, Rs 10,000/- thlenga chawi tir theih an ni.

Hawnna neih zawh hnu hian Pollution Testing Centre Champhaiah Pollution Test hi dan anga kalpui tan nghal a ni.