No.7513/2020-2021
Pu Zothanmawia, Deputy Commissioner & Chairman, District Level Task Force on Covid-19, Khawzawl District thuchhuah chuan Covid-19 hrilengin Mizoram-ah ziaawm lam a pan chhoh mek thu leh sawrkar official, khawtlang hruaitu, NGO leh mipui thawhrimna leh thuawih rah thil lawmawm tak a nih thu tarlangin, Covid-19 hrilengin ziaawm lam a pan mek chuan nitin nunphungah fimkhur lohna a thlen phah ni a a lan thu a tarlang a. Covid-19 hri chu awlsam taka inkaichhawn theih a nih avangin inthlahdah theih a nih rih loh thu leh, Covid-19 laka kan himna tura sawrkarin inkaihhruaina a siam hrang hrangte chu tha taka zawm chhunzawm zel a tul thute mipuite a hrilhhre nawn leh a, Khawzawl District mipuite chu Covid-19 laka himna tura sawrkarin inkaihhruaina a duan a hnuaia tarlante hi zawm theuh turin a chah a ni.
1. Pawn (vantlang/puipunna hmun, dawr, office, damdawiin, clinic adt.) chhuak tur reng reng chuan face mask emaw hmanraw dang hmangin hmai an tuam ngei ngei tur a ni.
2. Sahbawn/hand sanitizer hmanga kut silfai ngun hi a la pawimawh reng a ni mai lo a, a hma aiin a pawimawh tawlh tawlh tih hriain inthlahdah hauh lova chhunzawm zel tur a ni.
3. Puipunna hmunahte chuan midang nen inhnaih lo thei ang berin social distancing ngaihpawimawha vawn tlat tur a ni.
4. Loh theih loh a nih loh chuan kum 65 chin chunglamte, taksa hriselna lama harsatna neisate (Chuap tha lo, HIV +ve, zunthlum nasa, lungna, kalna adangte), naupai leh naupang kum 10 (sawm) hnuailamte chu pawn chhuah loh hram tur a ni.
5. Khawzawl town chhungah zan dar 8:30 leh zing dar 4:30 inkarah curfew puan a ni a. Curfew order-in a huam loh te tih loh chu hemi hun chhung hian pawn chhuah khap tlat a ni.
6. Lirthei khalhtute (a bikin public transport) leh an phurh te’n face mask an vuah vek tur a ni a, passenger-te hman tur hand sanitizer an pai reng tur a ni. Tin, lirthei khalhtuten a zing thei ang berin lirthei chhung, thutna leh vawnbante uluk takin an tithianghlim thin tur a ni.
7. Dawr neituten face mask vuahin, anmahni dawrtute tan hand sanitizer an chhawp tur a ni. Tin, anmahni dawrtute hming, address, contact number leh dawr hun chhinchhiah nan Sulhnu app hmanga scan tur QR Code fiah tha tak an tar tur a ni a, dawr tlawhtu te’n QR code an scan ngei a ni tih an finfiah zel tur a ni. Sulhnu app hmang lo te’n chanchin kimchang an ziahna tur lehkhabu (register) an chhawp tel bawk tur a ni.
8. Dawr zawng zawng damdawi dawr tiam lovin tlai dar 5:30 hmain khar vek tur a ni.
9. Chhiatni thatni leh a kaihhnawih puipunnate, Sakhaw biak inkhawmna hmunte, infiamna (games and sports) kaihhnawih puipunna leh thildang vanga mipui punkhawmna hmuna zawm tur DC office atanga hriattirna tihchhuah tawh hrang hrangte chu tha taka awm tur a ni.
Inkaihhruaina hrang hrangte hi Khawzawl District chhunga Village Level Task Force-te chu an veng/khua theuhah a khat tawka Tlangau hmanga puangzar thin tura beisei an nih thu a hriattir a ni.
