Vawiin chawhnu dar 2:00 khan Champhai DC Pu Vijay Kumar Bidhuri kaihhruaina in Champhai DC Conference Hall-ah sipai tanglai leh sipai bangte chungchang sawiho a ni.

Champhai DC chuan sipai te leh an chhungte harsatna an neih leh an sutkian pui dan tur a ruahmanna hrang hrang te chungchang sawi hawnna hmangin hmalak zel dan tur te sawiho a ni. Sipai tang lai leh bang ta te leh an nupui fanaute awm dan zel tur hi hi District Sainik Welfare & Resettlement te hian lo buaipui an in huam em em laiin he office a inhriattir lo (la in register lo) an awm thin a, chu chuan bawhzui pui lamah harsatna a siam thin a ni. Champhai ah ngei Sainik Office hi a awm tawh avangin thu chhia thu tha thlen zel turin an ngen a ni.

Sipai tang lai leh tang thar te pawh he Sainik Office ah hian in Register ngei ngei tur a ni a, Sipai tan hnu ah chuan hei hi zawm tur a ni.In ziak lut lo te chu Sainik Office tan hian tanpui leh bawhzui pui a harsa thin a ni.

Sainik Office, CHANEM Building hi 14 March, 2011 ah Chief Minister Pu Lal Thanhawla’n a hawng a, kawng tam takah hma lakna pawh an nei tawh a ni. Sainik Office hian sipai tanglai leh bang tawh te tanpuina leh chhawmdawlna ah te an buaipui thin a, chhiatni thatni ah pawh sum leh paia tanpuina thlengin an khawih a. Sipai bang, tanglai leh tang duh te tan kawng hrang hrangah rawn theih reng an ni.

He meeting ah hian DC Champhai bakah Maj (Rtd) Samuel Lalliansanga, DSW & RO, Champhai, Maj. Rajesh Jha, F-Coy Commander, 14 Assam Rifles, Champhai leh Pu Zothlamuana, Deputy SP, Champhai te an tel a ni.