No.2202/2021-2022

Aizawl the 13th September, 2021 : District Disaster Management Authority, (DDMA), Champhai District chu vawiin chawhnu khan Bawrhsap Pi Maria C.T Zuali hovin DC Conference Hall-ah an thukhawm a, he hunah hian Covid-19 dona kawnga hmalaknate thlirho niin, College class tan leh chungchang bakah African Swine Fever (ASF) khuahkhirh zel dan tur chungchangte rel a ni.

Pi Maria C.T Zuali chuan Covid-19 vanga hun engemawchen nunphung a khaihlak hnuah nunphung pangngaia let leh tura kal tan a tul tawh thu sawiin, hrilengin engchen nge a awh dawn tih a hriat loh a, him tlanna tura mimal tinte zawm tur tha taka zawm chunga khawsak phung pangngaia let leh a hmasawnna kawng hawia hnathawh a tul a ni, a ti a. Covid-19 hri laka him nana kut silfai leh hmai tuam chuan tlang hrileng dang lakah nasa taka mipuite a ven that thu a sawi a. Covid-19 hrileng beihlet kawnga VLTF te thahnemngaihna leh sawrkar an thlawpna chu fakawm a tih thu a sawi bawk.

College kal hun tur chungchang ngun taka sawiho a nih hnuah DDMA Champhai District chuan Covid-19 laka himna tura inkaihhruainate tha taka zawm chungin September ni 20, 2021 atangin College hawnga class kal tan leh nise a ti a, class kal dan tur kimchang chu College thuneitute kutah a dah a. Vawk natna hri hlauhawm tak African Swine Fever (ASF) leng mek khuahkhirh a nih zel theih nan District Magistrate thuchhuahte tha taka zawm zel nise tih a ni. DVO Champhai tarlan danin vawiin thleng khan Champhai District-ah ASF vangin Vawk 499 an thi tawh a, a thih tamna ber Zokhawthar khuaah Vawk 257 an thi tling tawh a ni.

He hunah hian CMO leh DMS Champhai hnen atangin 3C, 4C, Home Isolation, DCHC dinhmun leh vaccine pek dan tlangpuite ngaihthlak a nih bakah, Govt. Champhai College Principal hnen atangin Covid-19 hrileng avanga inkhuahkhirhna kalpui a nih chhunga Zirlaite class lakpui dan leh exam neih dante ngaihthlak a ni bawk.

DDMA Champai District meeting-ah hian fimkhur tak chungin nunphung pangngaia let leh tura ngaihtuahna hman a hun tawh thu leh, Covid-19 vanga hna thawh theih loh leh inhrekna hrang hrangte kalsan tura inpuahchah a hun tawh thu tarlan a ni a. Eizawnna leh mamawhna avanga District danga zin chhuakte khunghrang thin an awm chu tih tawh loh nise tih a ni a. Covid-19 vei tam takin khawtlang tangrual enkawl Community Covid Care Centre (4C) kaltlanga enkawlna an dawn thu leh, hrikai darh chak lutuk tur ven kawnga khawtlang leh kohhran inpeknate a chhuanawm takzet thu he hunah hian tarlan niin, positive contact tracing kalpui kawngah mi nawlpuite harsatna thlen lo tura thlurbing thiam a tul thu pawh tarlan a ni bawk.

He hunah hian Pu Lalrinpuia Varte, SP Champhai, DDMA member dangte bakah sawm bik official, Assam Rifles, VC, Sub-Hqrs. YMA leh MJA aiawhte an tel a ni.