2962/2022-2023

Champhai, the 6th December, 2022: Tunhnaia Champhaia vanduaithlak taka chhiatrupna thleng chungchangte ngaihtuahin District Disaster Management Authority (DDMA) chu an Chairman Pu James Lalrinchhana, District Bawrhsap hovin vawiin chawhnu dar 1:00 khan DC Conference Hall-ah an thukhawm.

DDMA Champhai Chairman Pu James Lalrinchhana chuan Keilungliah tuikhuah enkawl chhunzawm zel kawnga hmalaknate kalpui chhoh mek zel anih laia vanduaithlak taka tuitla hriat tur a awm hlauh maite, ruang hmuh a la ni lo leh vanduaina dang chenna in kang Champhai Electric Venga thlengte chu pawi a tih thu a sawi a. Vanduaina tawkte thinlung taka a tawrhpui thu sawiin, a tul ang zela hmalak tum a ni, a ti bawk.

He hunah hian Pi Esther Leihang, Nodal Officer i/c DM&R Champhai chuan tunhnaia chhiatna thleng pahnih, December ni 4, 2022 Pathianni chawhnu dar 1:30 vela Keilungliah tuikhuaha tla hlum Pu Lalbiakliana (33), Bethel Veng Mualnuam leh December ni 5, 2022 chawhma dar 10 vela Vaihmun, Electric Venga Pi Rochhingpuii leh Pi Lalzamliani (L) te in chhan hriat loha kangral chungchanga thil thlen dan kimchang leh DDMA anga hmalak dante a tarlang a. Pu VL Hruaimawia, District Organiser, DM&R Champhaiin District Disaster Management Authority (DDMA) leh District Disaster Management Committee (DDMC) kalphung leh mawhphurhnate a sawifiah bawk a ni.

DDMA thukhawm chuan tunhnaia Champhaia chhiatna thleng pahnihte ngaihven thuaia a tul ang angte buaipuia theihtawp chhuahtu bialtu MLA, YMA, VC, SDMA Quick Response Team, Sairang YMA leh tlawmngaia che chhuak, sum leh tha sengtu zawng zawngte chungah lawmthu a sawi a. Heng bakah hian mawhphurhna hrang hrangte hlentu Sawrkar Department-te chungah lawmthu a sawi bawk a. Vawiin ni thlenga theihtawp chhuah a ni chunga Keilungliah tuikhuaha tla ruang hmuh a la nih loh avangin 1st Battalion National Disaster Response Force (NDRF) Mizoram-te chah tha tih niin, chah nghal an ni a, hemi hnua hmalak ngaihna a awm chuan ruahmanna siam zel nise an ti a. Chhiatrupna thlen thulha chetlak dan tur leh hemi chungchanga pawimawhte inhrilhhriatna hun remchang hmasa bera neih nise an ti bawk a. He hunah hian Vaihmun, Electric Venga kangmei chhuahna in chu dan lova petrol leh diesel zawrhna anih avangin fimkhur lo taka kangmei tichhuak thei thil kawl leh zawrh thubuai, Criminal Case IPC 285 ziahluh anih thu leh chhuizui mek anih thu tarlan a ni bawk a. Chinfel tulte buaipui fel anih hnuah DM&R dan anga chhawmdawlna Rs 1,01,900/- ve ve pek theih an nih dawn thu tarlan a ni bawk a. DDMA Champhai chuan mipuite chu khua a rova, a thal chhoh leh tan tawh avangin kangmei chhuak thei laka fimkhur turin a chah nghal bawk a ni.

Heng bakah hian DDMA Champhai chuan hmanraw neih mekte bakah tui tlate buaipuina kawnga chak lehzuala hmalak zung zung anih theih nan hmanraw changtlung zawk leh mamawh dangte pawh ngaihtuah tha a ti a; chetlak dan thiam bikte chherchhuak tura hmalak nise an ti bawk.

Vawiin DDMA Champhai thutkhawmah hian Superintendent of Police Pu Lalrinpuia Varte, DDMA Chief Executive Officer & Addl. DC Pu B.Lalchhawntluanga leh Member dangte an tel a ni.