2961/2022-2023

Aizawl, the 6th December 2022 : Home Minister Pu Lalchamliana’n chuan vawiin 5th Bn. Assam Regiment atanga pension chhuaka intelkhawm Ex-Fighting 5th Association (EFFA) ten an regiment-in kum 1971-a India leh Pakistan Indonaa Battle Honour of Chhamb Honour an hmuh vawi 51-na hriatrenga hun Synod Conference Centre-ah an buatsaih chu hmanpuiin Battle of Chhamb-a Mizo sipaite tawnhriat ziahna lehkhabu ‘Op-Cactus Lily Indo Pak War 1971(Chhamb Sector, J &K) 5th Battalion The Assam Regiment’ tih chu a tlangzarh nghal a ni.

Home Minister Pu Lalchamliana chuan sipai bang te leh an thlahte kal zel te chu Mizoram tan kawng hrang hrangin an thawhhlawk hlein khawtlang tan mi tangkai an nia a hmuh thu a a sawi a. Mizoram Sawrkarah te, khawtlang nun leh kaihhruaina kawngah te, Kohhran rawngbawlna lamah te leh politics thlengin sipaia lo tang tawh te thawhhlawkna tam tak sawi tur a awm a ni, a ti a. Sipai leh an chhungte chu inthunnna atanga zik chhuak an nih angin kawng hrang hranga hmahruaitu nia an thil tha tihna kawngah midang kawhhmutu ni turin he hunah sipai bang leh an chhungte kalkhawmte chu a chah a ni. Battle of Chhamb-a tel Mizo sipaten a hunlaia thil thleng leh an tawnhriat ziaka an buatsaih chu thil hlu tak nia a ngaih thu sawiin an chanchin chu thamral lovin a awm dawn a ni, a ti.

Home Minister chuan Mizoram anga state, sawkar hnaa innghat tamnaah chuan Sipaia tan chu vawiin thleng pawhin eizawnna tha tak nia a hriat thu sawiin tuna Central Sawrkarin sipai lak dan thar a ruahman Agniveer Scheme chu thalai te’n an ngaihsak a tul nia a hriat thu a sawi lang. Kum engemaw zat kalta atangin IAS Direct Mizo-in kan neih loh leh State pawna Central Sawrkar hna tam tak entirnan Central Secretariat hna te leh Group B dang hna leh a dangtea Mizoram atanga tling an awm meuh lo chhan pakhat ni thei awm ka rilru a awm chu Mizoramah Sawrkarin a hnuai thawkte dinhmun a tihthat em vangin kan thalai lehkhathiam te hian hmun danga thawh leh hna zawn hi an duh lo hial ta em aw tiin ka ngaihtuah a. Manipur lama kan Zohnahthlak te chu Central Sawrkar office hrang hranga Group B lamah kumtin mi engemawzat an tling a, chutih laiin Mizoram atanga kan thalai inziaktling awm meuh lo hi ngaihtuah zui a tul hle a. Hemi lamah hian thalai ten an ngaituahna senga heng exam a tling ngei turin tan la se tiin a duh thu a sawi.

Lt.Col. ZS Zuala (Rtd.), Vice President, Mizoram Ex-Services League; Pu Hmingdailova Khiangte, IPS (Rtd.) leh EFFA Senior Adviser ni bawk; Surg. Lt. Cdr (Retd.) Lalnuntluanga, Sainik Welfare & Resettlement Director leh Major Rebecca Lalzarzovi Chhakchhuak (Rtd), District Sainik Welfare & Resettlement, Aizawl District ten he hun hi telpuiin thusawina hun te an nei a ni.

He lawmpuina hi kum Dec 1971-a India leh Pakistan indo tuma Jammu & Kashmir a Chhamb khuaa bula 5th Assam Regiment ten indonaa an huaisenna leh an tihthatna avangin India ram sipai battalion zawng zawng zingah anni chu an indona hmun hming chhalin ‘Honour of Battle’ hi India Sorkar chuan a hlan a ni.

Ex-Fighting 5th Association (EFFA) –ah hian sipai bangte bakah indonaa pasalthate hmeithai, an pasalten an boralsan tawhte pawh an tel a. Kum tin Chhamb Honour of Battle hi December ni 5-ah lawm thin a ni a, kuminah erawh remchan zawkna avangin vawiin hian hman a ni.