2963/2022-2023

Pawltlak thla ni 6, 2022: Electoral Roll Special Summary Revision 2023 neih mek chungchangah nimin khan Electoral Roll Observer Pi Lalzarmawii, IAS, AH & Vety Secretary chuan Lawngtlai tlawhin, election official-te, Booth Level Officer-te, political party leh tlawmngai pawl ai awhte meeting a neihpui.

Electoral roll special summary revision chungchang meeting Circuit House-a buatsaihah Pi Lalzarmawii chuan Lawngtlai District-a electoral roll felfai leh hrisel a awm theih nana official, BLO, political party leh tlawmngai pawlte thawh hona ṭha tak a hmun ngeia a hmu thei chu lawmawm a tih thu sawiin, electoral roll ṭha, dik leh felfai tak nei turin roll-a chuang tur dik takte an chuan a, a chuang lo turte an chuan loh a pawimawh a ni, a ti a. Lawngtlai District chu ram dang nen ramri thui tak inṭawmna a nih avang leh tun hnaia raltlan eng emaw zat an lo luh avangin electoral roll buatsaih chungchangah fimkhur a ṭul zual tih sawiin, electoral roll rin tlak a awm theih nan revision leh continuous updation-ah political party leh tlawmngai pawlte chu theih tawp chhuaha official-te ṭanpui zel turin a sawm a ni.

Electoral Roll Observer hova meeting-ah hian Lawngtlai District Election Officer charge la mektu, Pi Marilyn Rualzakhumthangi chuan draft electoral roll dinhmun leh special summary revision neih meka hma lakna tlangpui a sawifiah a. ERO leh AERO te'n electoral roll atana hearing an kalpui dan report pein, zawhna leh chhanna hun hman a ni a. Electoral roll dik leh felfai tak a awm theih nana hma lak chhunzawm zel dan tur te sawi ho a ni bawk.

Special Summary Revision, 2023 kalpui mekah hian draft electoral roll-ah Lawngtlai District-a Assembly bial pathum - Tuichawng, Lawngtlai West leh Lawngtlai East-ah vote nei mipa 43,394 leh hmeichhia 43,606, an vaiin mi 87,000 an awm a. Luh belh, paih, insawn leh siam ṭhat duhte tan December ni 8, 2022 thleng hun hawn niin, January ni 13, 2022-ah final electoral roll chu tar chhuah tura ruahman a ni.