2964/2022-2023

Pawltlak thla ni 6, 2022: Union Minister of State for Food Processing Industries & Jal Shakti Pu Prahlad Singh Patel chuan vawiin khan Lawngtlai District tlawhin, Mampui khua a hmuna a tlawh bakah, Lawngtlaia Sawrkar Laipui ruahmanna hnuaia hmasawnna hna thawh hrang hrang (centrally sponsored scheme) thlir hovin head of office-te review meeting a neihpui a, Lai Autonomous District Council (LADC) official-te leh tlawmngai pawlte nen inkawm hona hun a buatsaih bawk.

Union Minister of State Pu Prahlad Singh Patel hi State Protocol Officer Pu K. Laltlawmlova chuan lo ṭawiawmin, Lawngtlai Helipad-ah Lawngtlai Bawrhsap charge la mektu Pi Marilyn Rualzakhumthangi hovin District Administration leh Police lam official-te leh Lawngtlai District BJP hruaitute'n an lo dawngsawng a ni.

Union Minister of State hian Mampui khua tlawhin, Community Hall-ah khawtlang mipuite nen inkawm hona hun buatsaih a ni a. He hunah hian Union Minister of State chuan thu sawiin, India rama district hnufualte chawi kan tuma Sawrkar Laipui hma laknaah Union Minister-te'n thingtlang khuaa kal chilhin an dinhmun an enfiah mek tih a sawi a. A ministry enkawl hnuaia hma lakna tar langin, Jal Jeevan Mission (JJM) hnuaia in tinin mahni ina tui an herh haw theihna tura Sawrkar Laipui aṭanga hma lakna kal mek chungchang leh ei tur sawngbawlna (food processing) lama tuite ṭanpui nana Sawrkar Laipuiin ruahmanna a neih hrang hrangte a tar lang a. Mipuite chu sawrkarin an tana hamṭhatna a duante chhawr thei tura an dikna leh an chanvo hre chiang a, bawhzui ṭhin turin a chah a ni.

He hunah hian Mampui khawtlang hruaitute leh mipuite'n an dinhmun lo hrilhfiahin, an mamawhte Union Minister of State hnenah hian an lo thlen a. Union Minister of State hian Govt Middle School, Mampui pawh tlawhin, an sikula tui dah khawlna leh inthiarna dinhmun te a enfiah a. Mampui khaw daia Lai Typical Village tlawh bawkin, JJM hnuaia Lawngtlai aṭanga Mampui khuaa tui pekna tur Lawngtlai leh Mampui inkara PHED lamin tui pipe phum hna an thawh mek chu a enfiah bawk. He hna hi March 2023 ral hmaa thawh zawh hman beisei a ni.

State sawrkar hnuaia department official-te nena Lawngtlai DC Conference Hall-a review meeting buatsaihah Bawrhsap Pi Marilyn Rualzakhumthangi chuan Lawngtlai District dinhmun tlangpui leh District chhunga sawrkar hma lakna langsar zualte a lem nen entirin report a pe a. Union Minister of State Pu Prahlad Singh Patel chuan a enkawl ministry, Food Processing Industries & Jal Shakti hnuaia mipui hamṭhatna tur ruahmanna ṭha tak tak - Pradhan Mantri Kisan SAMPADA Yojana (Scheme for Agro-Marine Processing and Development of Agro-Processing Clusters) leh PM Formalisation of Micro Food Processing Enterprises Scheme (PMFME Scheme) nihphung tlangpui tar langin, Lawngtlai District mipuite’n an chhawr theih nan official kal khawmte chu theih tawp chhuah turin a chah a. Ei tur sawngbawlna (food processing) industry chu eizawnna ṭha tak a nih thu sawiin, a tui mite tan chuan Ministry-ah mahniin proposal pawh theh luh tlang theih a nih thu a sawi a ni.

Union Minister of State hi Lai Autonomous District Council (LADC)-a Town Committee Chairman Pu Sanghuliana Mualchin hovin LADC official-te pawhin hmuin, a hnenah hian LADC mamawh hrang hrang an thlen a. Tlawmngai pawl ṭhenkhat pawhin hmuin, mamawh an neihte a hnenah hian an thlen bawk a ni.

Hemi hnu hian Union Minister of State Pu Prahlad Singh Patel chuan Aizawl panin helicopter-in Lawngtlai hi a chhuahsan leh nghal a ni.