Vawiin khan DC Conference Hall Mamitah District Disaster Management Authority (DDMA) chu an Chairman Pi Lalbiaksangi District Bawrhsap hovin an thu khawm. 

Meeting-ah hian chhiatrupna thlen thulha Sorkar Department hrang hrangte hmalakna tur sawiho anih bakah State Disaster Response Force (SDRF) dinhmun thlirho a ni a. An hmanraw neih te hman mai theih tura inralring reng tur leh Fit taka awm reng turin Meeting-ah hian sawilan a ni. 

Mamita Power Supply a lo that zawk nan District Disaster Management Authority (DDMA) hmalaknain March Ni 29 hian Sorkar Department hrang hrang leh Sub Hqrs YMA tangkawpin Jungle Clearance beihpui neih tura ruahman a ni bawk. 

Kan hma lawka Fur lo thleng turah mipuite him zawkna tur leh harsatna an tawh loh nan Meeting-ah hian Sorkar Department hrang hrangte chanvo insiam a ni a. Thlipui leh ruahpui a thawh thut pawha rang taka che vat turin Power & Electricity Department te chu hriattir an ni a. PHE Department chu chhiatrupna thlen thulhah pawh tui thianghlim hnianghnar taka pekchhuah tur nei tura inralring reng tura tih an nih bakah Damdawi in lama thawktute pawh damdawi kawlsa nei reng tur leh First Aid pek ngai an awm pawha rang taka che thei tura inralringa awm reng tura tih an ni a. DIPRO pawh media kaltlanga Awareness Campaign nei thin tur leh PWD pawh a tul anga inkau renga awm turin Meeting-ah hian sawilan a ni. 

Vawiin Meeting-ah hian Addl. DC Mamit/Nodal Officer DDMA,  Addl. SP Mamit,  SDO (S)Mamit, EE, PWD Mamit, EE, PHE Mamit , EE, P&E Mamit , Asst. Commandant 4th IR te bakah CMO, Mamit te an tel an ni.

Attachment

  • Loading attachment...