1958/2023-2024

Hnahthial the 20th September 2023: District Election Office (DEO), Hnahthial leh Mizoram State Rural Livelihoods Mission (MzSRLM), Block Mission Management Unit (BMMU), Hnahthial RD Block tangkawp chuan vawiin khan Systematic Voters Education & Electoral Participation (SVEEP) pualin MzSRLM hnuaia Self Help Group (SHG) nuho te hnenah election chungchang hriatna tizau tur leh voter ten an vote hlutna te, vote thlak pawimawhnate an hriat theih nan zirtirna an pe.

Hnahthial District SVEEP Nodal Officer Pi K Ngosai chuan thu sawiin MLA inthlanpui hnuhnung berah Mizoram-a vote nei zawng zawng atanga za zela chhutin vote thlak (average turn–out rate) chu 80.15 a nih thu a tarlang a. South Tuipui Assembly Constituency-ah chuan 82.90 a ni a ti a, state average a khum chu lawmawm a tih hle thu a sawi. Chutihrual chuan polling station thenkhatah State average aia tlem a awm thu tarlangin tan lak a ngai hle a ni, a ti. SVEEP Nodal Officer chuan MzSRLM hnuaia SHG-te chu pawl thiltithei tak leh chhuanawm tak an nih thu sawiin kumin inthlanah theihpawp chhuahpui turin a sawm a, Mizoram mai bakah India ram puma vote thlak tam ber state an nih ngei theih nan mipui hrilhhriatna kawngah theihtawpa tan lak pui turin a sawm a ni.

Vawiin campaign-ah hian District Election Office, Election Branch Hnahthial atangin Pu Vanlalrohlua chuan election thil a hriat tur pawimawhte sawifiahna hun a nei a, mipui vantlang tana Election Commission of India ruahmanna hrang hrang – National Voters’’ Service Portal (NVSP) te, Voter Helpline App te, Saksham ECI Mobile Application chungchangte sawifiahin mipuiin awmsam taka electoral roll a in ziahluh, paih ngai paih, siam that ngai siam that, PwD voters te tana hamthatna awmte leh thil dang tam tak chungchang zirtirna a nei nghal a ni.

MzSRLM, BMMU, Hnahthial RD Block -ah hian tun dinhmunah staff 7 an awm mek a, SHG 660 awm mekin SHG member 5223 an awm mek a ni. Ni-3 awh tur ‘Block Level Residential Training on CBO Grading & CF Refresher Training’ chu Block Mission Manager (BMM) Pi Lalchhuanmawii leh thawktu dang hovin Hnahthial RD Block huam chhunga khaw tin atanga Community Facilitator (CF) te kohkhawm niin an neihpui mek a ni.

Vawiina voter Awareness Campaign-ah hian Hnahthial BDO Pu Lalbiakfela bakah Hnahthial SDC Pi Betty Lalrinfeli ten an telpui a ni.