1957/2023-2024

Dated Siaha 20th September 2023 : 22- Siaha East I MDC Constituency by-election neihna tur atana inbuatsaihna kal zelah vawiin khan Pu Lalhmunsanga Hnamte, District Election Officer chuan Siahaa Journalist leh media mi te chu DC Mini Conference Room-ah 'Press briefing' a neihpui.

Pu Lalhmunsanga Hnamte chuan 22- Siaha East I MDC Constituency by- election felfai taka neih a nih theih nan inbuatsaihna chak taka kalpui mek zel a ni, a ti a. State Election Commission-in Ni 6.09.2023- a by - election neihna tura hriattirna a chhuah hnuin hemi ni vek hian Returning Officer chuan hriattirna a chhuah ve nghal tih a tarlang a. Ni 12.09.2023 thleng nomination file theih niin, BJP, INC, MNF leh ZPM party atangin nomintion file an awm thu sawiin tumah inhnukdawk an awm lo a ni, a ti. By-election atana hman tur EVM chu Chawngte (C) atanga lo phurh mek a ni tih tarlangin ni 25.09.2023 hian EVM hi endik a ni ang a, ni 27.09.2023 ah Commission a ni ang a ti.

District Election Officer chuan Sector Magistrate atan Pu Sahlo Bohia, Lecturer, DIET Siaha chu ruat a nih thu sawiin Magistrate power dil mek a ni, a ti. Polling Official turin Presiding Officer leh Reserved pakhat ruat an nih thu tarlangin Polling Officer atan Booth tinah mi pathum theuh leh reserved pakhat ruat a nih thu a sawi a. Polling Official te hian ni 21.09.2023 ah training an nei ang a, Pu Ngurthansanga, BDO, District Level Master Trainer chuan training- a neihpui tur thu a sawi bawk. Vote thlak ni atan ni 29.09.2023 (Friday) ruat a nih thu sawiin, zing dar 7 atanga tlai lam dar 5 thleng vote hi thlak tur niin vote thlak that a ngaih chuan a tukah vote thlak thatna hi neih tur a ni, a ti. Vote hi ni 3.10. 2023 ah DRDO Conference Hall- ah chhiar tur niin ni 5.10.2023 ah by- election zawhfel vek a ni ang a ti bawk.

Pu Lalhmunsanga Hnamte chuan by- election puan anih atangin Model Code of Conduct hman tan nghal a nih thu sawiin ni 27.09.2023 tlailam dar 5-ah Campaign zawng zawng tih tawp vek tur a ni, a ti a. 22- Siaha East I MDC Constituency-ah hian Polling Station pali- New Siaha West-I (Primary School-1), New Siaha West-II (Model Middle School), New Siaha East-I (GHSS) leh New Siaha West-III ( Primary School-1) a awm thu tarlangin, vote nei zawng zawng mi- 2844 an awm mek tih a sawi.

Pu Lalhmunsanga Hnamte chuan by-election felfai taka neih a nih theih nan journalist leh media mi te chu an pawimawh takzet a ni tih sawiin inthlanna tluang taka neih a nih theih nan thawhpuiah a sawm nghal a. Vawiin press briefing- ah hian Siahaa Journalist leh media te bakah Addl.DC, Election Officer leh DIPRO Siaha te an tel a ni.