1956/2023-2024

Aizawl the 20th September, 2023: Govt. KM Higher Secondary School chuan vawiin khan an School kawtzawlah Annual Sports Closing Function vawi 26-na an hmang a. Pu Lalruatkima, I&PR, LR&S, etc department changtu minister chuan Khuallian ni-a hmanpuiin 26th Annual Sports Overall Champion Red House hnenah champion trophy a hlan.

Khuallian chuan Indian ramin G20 Presidency kan chelh mek laia Mizoram ngei pawh G20 delegates te kan lo mikhualna-ah kan hnam lam, culture leh traditions kan lo phochhuak ve tawh a, KM HSS naupang Costume Parade leh hnam lam hrang hrang rawn entirtute chu an duailo hle tiin Ram leh hnam inpumkhatna kawngah sulsutu nih tum theuh turin duhsakna a hlan. Minister chuan tun hunah hian thenawm ram buaina avangin Mizoram-ah raltlan mi 60,000 vel kan awm mek bakah zirlai 6,000 a thlawna zirtirin, Mid day meal leh zirlaibu nen a thlawnin kan lo enkawl mek a, Kan unaute'n kan ram nawmna min rawn tawm ve hi kan lawm a ni a ti. Marksheet lama mark hmuh that ringawt hi a tawk lova, thiamna tak tak nei turin rinawmna, taihmakna, tawrhchhelna, thawhrimna, bei fan fanna avangin kan hlawhtling thin a ni a ti. Mark tha ringawt hi a tawk lova, thiam thei emaw thiam thei lo zirlai kan ni thei, a pawimawh ber chu huaisen taka, inrintawkna leh tumruhna nena bei thin te chu an chungnungin mi hlawhtling an ni zel thin a ni a ti. A thei theite hlawhtlinna huna kan awm mek lai hian eng nge kan tum, eng nge kan goal tih hi kan ngaihtuah fo a ngai a. Lehkha thiam pawimawhna sawiin eng eizawnna kawng pawh thlang ila, lehkha thiam hmasak hi a pawimawh a ni tiin intum a ruh phawt chuan theih loh innei lovang a ti. Zirlaite chu kan lei Pathian, nu leh pate chawimawia zah tur kan ni a. Khawvel hrut chhuak mah ila, kan nu leh pa aia min hmangaihtu hi an awm lo a ni tih hi hrereng turin a chah a. A ber nih tum a, tumruh tura fuihin kan Chief Secretary hlui Pu Lalmalsawma, IAS chu KM high school chhuak a nih angin tuna KM zirlaite pawh inla ni vek thei a ni tih inhriat ka duh a ni a ti. Zirtirtute chu zah tak chunga hmachhawn zel tur leh Pathian tih zel turin zirlai naupangte chu a chah bawk.

Pu Lalnunzira Miller, Principal, Govt. KM HSS chuan inlawmna thuchah sawiin an School chu India ram zau tak, hnam hrang hrang inlungrual taka an chenna ram nena tehkhinin, "Zirlai naupang engemaw zat thenawm state leh Mizoram District sawmpakhat atangin kan nei a, zohnahthlak hnam hrang hrang bakah Reang (Bru), Chakma, Kawl, Nepali (Gorkhali) leh Bengali-te'n inlungrual takin leh innghirnghona awm lovin tha takin kan zirlaite'n lekha an zir thei a ni," a ti. Vawiin kharna programme-ah hian heng hnam hrang hrangte hian an hnam ziarang phochhuahna hun hmangin Costume Parade leh an hnam lam an entir bawk a ni.

Govt. KM (Khawpuia Memorial) Higher Secondary School hi Kum 1967-ah High School a din niin Kum 1996 ah Higher Secondary-ah hlankai leh a ni a. Tunah hian school naupang 700 vel awmin Science leh Arts subject bakah vocational subject Automative-IT subject te a zir theih a, Lecturer 38 leh support staff 10 an awm mek a ni.

Miss Lalchungnungi leh Sir Lalremsanga, Lecturer Govt. KM HSS-te'n Annual Sports chhunga inelna hrang hrang an buatsaiha lawmman semna hun an hmang a. Sports chhung hian zirlaite house Pali-ah inthenin sports discipline hrang hrang indoor leh out door-ah inelna an nei a ni.

Annual Sports kharna session khatna hi Pu. C. Laldinpuia, Chairman, Games & Sports, Lecturer, KM HSS chuan a kaihruai a, Pu Laltanpuia Chawngthu, Lecturer, KM HSS chuan lawmthu sawina hun a hmang a ni. Sports closing session hnihna hi Miss Catherine L. Sailo, Lecturer KM HSS kaihhruaiin naupangte tan intihhlimna hrang hrang buatsaih a nih bakah Govt. KM HSS Cultural Troupe te'n cultural show neiin hun an hmang a. Dawrpui Vengthar Local Council member, Dawrpui Vengthar YMA OB te bakah Govt.KM HSS atana mi pawimawh tak tak te sawm an ni a, Pu Robert Zosangliana, Chairman, Dawrpui Vengthar LC pawhin he hunah hian thusawina hun a hmang a ni.