1959/2023-2024

Khawzawl 20th September, 2023 : India rampum huap a Rashtriya Poshan Maah (Nutrition Month) hman mekah vawiin khan ICDS Khawzawl Project leh District Hospital, Khawzawl tangkawp bultumin Govt. Middle School II, Khawzawlah Anaemia Camp buatsaih a ni a, hetah hian naupangten thisen an tlakchham leh tlakchham loh an endik a ni.

Vawiina Anaemia Camp buatsaihah hian District Hospital, Khawzawl aiawh te chuan Govt. Middle School II zirlai naupangte thisen laksakin thisen an tlakchham leh tlakchham loh an endik a, hetah hian naupang 56 te thisen dinhmun enfiah a ni a, zirlai naupang thisen endik sak te hi an vaiin an Result a tha vek a ni.

Anaemia Camp neih dawn hian Programme tawi buatsaih niin hetah hian CDPO Pi Lalremthangi Hauhnar chuan Poshan Maah hman mek chhunga an hnalakna hrang hrang te sawiin Anganwadi Workers, Helpers, ASHA leh Health Workers ten raipuar leh naupawm te tlawhin nau enkawl dan chungchang inzirtirna an neihpui thu te, tleirawl leh rawlthar te zingah thisen tlachham an awm lohna tura inzirtirna an neihpui thu te, September ni 6 atang khan nausen in thla 6 an nih thlenga nu hnute tui an mamawh dan leh thla 6 an tlin atanga chaw pangngai pek a pawimawh dan inzirtirna an neih thu te, September ni 9 atang an Project huamchhung khaw hrang hrangah Food Research Mapping an neih thu te, September ni 11 atangin naupang buk runpui an neih thu leh hetah hian naupang an kum mil a an rih dan tur anga rit lo, (Severed Acute Malnourished & Moderate acute Malnourished) an hmuh chhuah te chu CDPO hnenah an Report zel thu te, nimin atangin Music Corners & Indigenous Toys insiamsiakna an neih mek thu te leh tun thla ni 26-ah Tribal Food Festival an neih leh tur thu te a tarlang a.

Programme zawh hian zirlai naupangte thisen dinhmun endikna hi an nei zui nghal a ni.