1960/2023-2024

Vawiin chawhnu khan Bharat Scouts and Guides, Serchhip District Council Meeting chu Serchhip DC Meeting Room-ah neih a ni a. District President Pu David Lalthantluanga, Serchhip DC ni bawk chuan meeting hi a kaihruai a ni.

Serchhip District huamchhungah hian tun dinhmunah Bharat Scouts and Guides unit 7 a ding mek a. Heng unit hrang hranga member te infuihtharna leh intuaitharna atan Grand Campfire chu kumin kum tawp lamah buatsaih tum a ni. Unit ding mek te hi Council hotute chuan hun remchang hmasa berah tlawh chhuah ni se tiin an rel a. An dinhmun leh hmalakna te a hmuna hmuhpui a, infuihtharna hun te hman tum a ni. District chhunga school hrang hrangah Bharat Scouts and Guides Unit din thar turin hma lak an tum a. Scouts and Guides chungchangah inzirtirna te, hriatzauna te, zirlai naupang te tan nakin zela hna an zawn hun thlenga pui thei tu tur thil tangkai a nih dan te inhrilhriat ni se, tiin awareness campaign neih tum a ni bawk.

He Council meeting-ah hian District President Pu David Lalthantluanga chuan Bharat Scouts and Guides hmasawnna tura thahnemngai taka ke pen turin kalkhawm te a sawm a. Serchhip District Bharat Scouts and Guides Secretary Pu CVL Hruaia chuan an pawl dinhmun tlangpui sawifiahna hun leh an hmalakna leh hmachhawp te sawifiahna hun a hmang a ni.