15/2024-2025 

Hnahthial the 2nd April 2024: DC Meeting Hall, Rallangtlang, Hnahthial-ah vawiin khan District Election Officer, District Bawrhsap ni bawk Pu Chuauhnuna hovin 29/South Tuipui (ST) Assembly Segment huam chhunga Booth Level Officer (BLO) ten thutkhawmna an nei.

District Bawrhsap Pu Chuauhnuna chuan vawiin thutkhawm chhan sawiin April ni 19 a Lok Sabha MP inthlan lo thleng turah buaina leh harsatna awm lova inthlan huaihawt a nih theih nan tul leh pawimawhte sawiho a ni a ti a, inthlanna thianghlim leh felfai a awm theih nan kalkhawmte thawhhopuiah a sawm bawk. BLO kalkhawmte chu inthlan hmasa lama an inpekna avangin lawmthu a hrilh a, nikum MLA inthlan pawh an zarah felfai takin an zo thei chauh a ni tiin an hna thawh chhuanawm a tih thu a sawi bawk. Kalkhawmte chuan an Polling Booth dinhmun theuhte report pein thawm that ngai awmte tarlanna an nei a, harsatna awm thei chinfel dan tur ngaituah ho nghal a ni. Vawiin meeting-ah hian mipui ten hahdam leh kokim taka vote an thlak theih nana ruahman Assured Minimum Facilities (AMF) – tui, electric, daihlim leh ramp chungchangte, Polling station 16 a web casting neih leh a nih dawn thu te, poll day-a mipui ten awlsam taka an serial no an hriat zung zung theihna tura ECI ruahman Voter Information Slip (VIS) semchhuah chungchangte bakah Voter Assistant Booth chungchangte sawiho bawk a ni. Zawhna leh chhanna hun buatsaih niin kalkhawmte chu an mawhphurhna theuh tha taka hlenchhuak tura chah an ni bawk. Hnahthial District SVEEP Nodal Officer Pi K Ngosai pawhin kalkhawmte chu MP inthlanah theihtawp chhuahpui leh turin a ngen a, inthlan hmasa aia vote tla a tam theih nan thawhhopuiah sawmin vote thlak theuh tura mipuite sawmna Flyers an buatsaih chu house to house campaign an neihnaah semchhuah sak nghal turin a ngen bawk. Vawiin thutkhawmah hian DEO Pu Chuauhnuna bakah Election Officer Pu Lalbiakfela, SDC Pi Betty Lalrinfeli te an tel bawk.