4224/2023-2024

Hnahthial the 16th March 2024: District Election Officer Pu Chuauhnuna, District Bawrhsap ni bawk hovin vawiin khan DC Meeting-hall, Rallangtlang ah thutkhawmna neih a ni a, kan hma lawka Lok Sabha MP inthlan lo thleng tur chungchanga thil pawimawh inhrilhhriatna te neih niin political party hrang hrang aiawhte leh District Media Certification & Monitoring Committee (MCMC) member te an thukhawm.

Vawiin meeting-ah hian DEO Pu Chuauhnuna chuan ECI in April ni 19 chu inthlan ni atan a puan tawh thu a tarlang a, theihtawpin an in puahchah chho mek tiin an hmalak tawhnate leh hmachhawp an neihte hrilhhriatna a nei. District Bawrhsap Pu Chuauhnuna chuan inthlanna thianghlim a awm theih nan leh candidate tin ten ( level playing field) intluktlanna an neih theih nan Election Expenditure Monitoring (EEM) team din a ni tiin candidate te sum senso uluk taka chhut a nih theih nan thil man bituk (rate chart) siam a ni tawh tih a tarlang a, chu chuan hlemhlepna leh uchuak taka pawisa senna tur a tih tlem phah a beisei thu a sawi bawk. Kalkhawmte chu uluk taka EVM an dahna strong room 4 an neih thu a hrilh a, EVM lakchhuah leh dahluh leh dawn apiangah felhlel a awm loh nan party aiawhte an tel ve thin thu tarlangin theihtawp chhuah pui leh turin a sawm. Kalkhawmte chu social media ah fimkhur tur leh mawihnai thei ang bera che thin turin a ngen a, inthlanna thianghlim leh felfai a awm theih nan tan la thar tura sawm bawkin India ram pumah Mizoram chu MP inthlanah vote tla chhe pawl a ni ziah a ti a, in fuih thar leh a, tan lak thar a ngai hle ti bawkin an tawiawmna a ngen nghal bawk a ni.
DIPRO Pi K Ngosai, MCMC Member Secretary ni bawk chuan MCMC nihphung tlangpui leh an mawhphurhna te a tarlang a, Party aiawh kalte chu political advertisement an neih reng rengin Model Code of Conduct (MCC) dan bawhchhiatna a awm leh awm loh endikna (certification) MCMC ah lak tur a nih thu hrilhin tan lak pui leh theuh turin a sawm nghal bawk.

Vawiin metting-ah hian political party hrang hrang aiawhte bakah District MCMC member te leh chanchinthar lakhawmtute an tel bawk.