No.4434/2020-2021

Kolasib, 24th August 2020: Vawiin chawhnu khan khan Dr H Lalthlangliana, District Election Officer, Kolasib district chuan a pisaah Kolasib district a Village Council inthlanna neih dan tur atana inpuahchahna kalpui dan tlangpui sawiin thutharlakhawmtute a kawm.

Dr H Lalthlangliana chuan, “Inthlanna thianghlim leh felfai bak ah Covid-19 hri lak a kan him tlanna tur atan kan inbuatsaih mek a ni”, a ti a,” Vawiin ah hian inthlan ni a Official duty tur te tan ballot paper hmang a vote thlak tir mek an ni bawk,” a ti. Village Council inthlan buatsaihna atan a Training hnuhnung ber pawh vawiin hian Returning Officer leh Sector Magistrate tan neih a nih thu sawiin an duty-na tur theuh an pan tan tawh dawn thu a sawi bawk a ni. Ni 26.08.2020 zing dar 7:00 AM atangin inthlanna bungrua hi pekchhuah tan a ni ang a, Sector Magistrate te enpuina hnuaiah, venhimna uluk tak nen, heng inthlanna bungruate hi a awmna tur hmun theuh panpui a ni dawn a ni. Presiding Officer leh Official dang ruatte enpuina hnuaiah ni 27.08.2020, zing dar 7:00 AM atanga tlai dar 5:00PM thleng vote thlak theih a ni ang.

Dr H Lalthlangliana chuan kum dang a kalpui thin, vote thlak turte hnen a Voter’s slip pek thin chu, hri lak a kan him zawk nan, tih loh tur a nih thu a sawi a, voter ten an mahni serial number an hrait theuh theih nan Electoral roll hi a darh zau thei tur ang berin Electronic media kaltlang a thawn darh mek a nih thu a sawi bawk a ni.

Vote thlak niah hian Polling Booth bulah voters te dinna tur, meter 2 dan zelah, chhinchhiahna siam a ni ang a, inthlanna felfal tak a kalpui a nih theih nan leh hri lak a kan him theih nana inkaihhruaina hrang hrang kengkawh turin YMA leh MPF te hnenah ngenna siam a nih thu District Election Officer hian a sawi. Vote thlakna hmun ah kut silna siam niin vote thlak turte tan hmai tuam vek tur a ni ang a, Polling Official ten voter identity finfiah nan an hmaituamna an hlih tir thei ang. Vote a tlak kim hnuah, a rual a vote chhiar hi kalpui tum a ni a, zan dar 7:00 PM ah vote chhiar tan tum a ni ang a, a tlingte puanna hun hi Returning Officer te kutah a awm dawn a ni.

Kolasib district-ah hian Voter 60,666 awmin mipa 29,451 leh hmeichhia 31,215 an awm a, Village Council 56 a awm a ni. Hortokiah vote nei tam berin voter 2777 an awm a, Saihapui V ah voter 171 awmin in 16 a awm a, vote tlemna ber a ni.