No.4433/2020-2021

Kan hma lawka VC Election lawm awm mai tur inpuahchahna kal zelah vawiin khan Lunglei DRDA Conference Hall-ah Observer to General Election, 2020 Pu Donny Lalruatsanga hovin meeting neih a ni. Meeting-ah hian Lunglei District chhunga recognized leh unrecognized Registered political parties atangin aiawh pathum theuh tel tura sawm an ni.

Election observer Pu Donny Lalruatsanga chuan election felfai leh ralmuang tak neih theih nan political party te an pawimawh takzet a ni tiin SEC-in election atana inkaihhruaina a siam SOP leh Model Code of Conduct-te tha taka zawm a kenkawh a nih theihnan political party aiawh kalkhawmte chu thawhho puiah a sawm a. Lunglei District chu Mizoramah VC constituency leh seat tamna ber anih bakah inkalpawhna harsa tak tak- lawng leh ke a kal ngaihna hmun te a awm nual avangin election huaihawt pawh a hautak hle a ni tiin tun thlenga inspection a neih tawhah Lunglei District Election Officer leh staff-te inpuahchahna chu tha a tih thu a sawi a. Covid-19 hrileng avangin kan fimkhur tlan a tul takzet a ni tiin Physical distancing (6 feet), mask vuah, kut sil, hand sanitizer hman, chil chhak loh tih te chu kan him tlan nan Lunglei District mipuite uluk taka zawm turin a chah bawk.

Vawiin meeting-ah hian SEC-in election atana inkaihhruaina a siam SOP leh Model Code of Conduct-te chipchiar taka zirho niin zawhna leh chhanna leh sawihona hun hman a ni.