1296/2026-2027

Siaha the 4th July 2026: Election Commission of India (ECI) in hlung taka a kalpui mek Special Intensive Revision (SIR) 2026 hmanga buatsaih Draft e-roll tlangzarhna chu vawiin khan DC Mini Conference Hall, Siaha-ah District Election Officer Pu VL Hruaizela Khiangtea’n a nei a, Political party hrang hrang aiawhte hnenah draft e-roll copy khat theuh a sem nghal a ni. 

District Election Officer Pu VL Hruaizela Khiangte chuan ECI in Kum 20 dana a buatsaih thin e-roll siamthatna runpui (SIR) chu India khua leh tui dik tak ten an dikna chanvo an humhalh theih nan a pawimawh hle a ti a, SIR 2026 hmanga buatsaih vawiina tlangzarh tak draft e-roll chu fimkhur taka endik a tul a, India khua leh tui dik tak, July Ni 1, 2026 a kum 18 tling tawh te roll a an chuan vek theih nan leh paih ngaite paih an nih theih nan draft e roll chu uluk taka endik a, finchhuah turin political party te leh NGO hruaitute a ngen a ni. 

Roll hrisel zia tehfung pawimawh tak pakhat chu roll hmasa zawk nena tehkhina vote nei zat danglamna 3% vel a nihin a ni tiin tuna draft roll tlangzarh tak leh Special Summary Revision 2025 a vote nei zat danglamna chu -3.51%  a ni a ti a, draft roll chu a hrisel thawkhat hle tih a lantir a , a lawmawm hle a ti bawk a ni.

Vawiina tlangzarh tak draft e roll hian July Ni 1, 2026 chu qualifying date ah a hmang a, qualifying date tarlan taka kum 18 tling tawh leh tling tur zawng zawngte roll a thun theih an ni. Draft roll in a tarlan danin Siaha District a Assembly Constituency pahnih awma vote awm zat chu a hnuaia tarlan ang hian a ni. 

39-Saiha (ST) AC 

Male voters :11,072

Female voters : 12,294

Total voters : 23,366

40- Palak (ST) AC 

Male voters : 10,192

Female Voters : 10,343

Total voters : 20,535

Siaha District pumah vote nei mi 43,901 an awm a, He hi Summary Revision 2025 final roll a vote nei aiin mi 1597 in a tlem a ni. 

Draft roll tlangzarh taka hming chuang lo emaw, paih ngai emaw, siamthat ngai emaw nei tan claims and objections hun, July Ni 4, 2026 atanga August Ni 4, 2026 thleng hawn a ni dawn a. Hemi hun chhung hian veng tina mahni BLO te kaltlangin siamthat ngai te siamthat theih a ni ang. Final roll hi Sept Ni 6, 2026 a tarchhuah tura ruahman a ni. 

Vawiin hian election official-te bakah political party aiawhte, NGO hrang hrang aiawhte leh chanchinthar thehdarhtute an tel a ni.