Vawiin khan Damdawi In fai inelna Kayakalp-2018 a lawmman pahnihna dawngtu Champhai District  Hospital  chuan lawmna hun Eye Department, District Hospital-ah   an hmang a. He hun hi Dr. ZR Thiamsanga, MLA Champhai North  leh Vice Chairman, Health & Family Welfare Board nibawk chuan khuallian niin a hmanpui a, District Bawrhsap Dr. Naveen Aggarwal, IAS  chu khualzahawm a ni.

Khuallian Dr ZR Thiamsanga chuan Champhaiin Primary Health Care a thlachham ni a a hriat thu sawiin Primary Health Care chu thuam that angaih thu a sawi a.Sawrkar hmalaknain Health Care tan cheng vaibelchhe 200 dah that a nih thu leh a tul huna hman mai theih tur cheng vaibelchhe 20 dah a nih thu a sawi a,  Mizoram Health Care Society chu Mizoram Health Board ti a dahin kumin October thla atanga kalpui chhunzawm a nih tur thu a sawi a. H&FW Board Vice Chairman chuan Doctor leh Nurse bakah LDC leh Fourth  Grade post ruak hnawh khahna atan cheng Vaibelchhe 150 an neih thu a sawi a, lak phalna an neih velah lak nghal tum niin kuminah pawh engemaw zat chu lak thar an nih a beisei a sawi a ni. 

District Hospital hrang hrang  4   chu thuam that turin an inruahhman mek thu a sawi a, chung zingah chuan Champhai District Hospital pawh a tel thu leh  Specialist Doctor-te thiamna leh theihna  tak hmang thei tura siam chu an tum ber pakhat a nih thu a sawi bawk.

Nursing College din turin District Hospital hian a tlem berah khum 100   a neih a ngai a, chumi tur chuan theih tawp chhuah a, District Hospital hi kan tihchangtlun phawt a ngai a ni, a ti a.   Champhai chu DC Chairman-na hnuaiah khaw fai, hrisel leh khaw mawi tak ni tura hmalak a duh thu sawiin, Champhai hi khaw zin chakawm taka tum anih thu a sawi bawk.

Khualzahawm, Dr Naveen Aggarwal pawhin thusawiin Mizo te'n faina an ngaihpawimawh dan chu ropui a tih thu a sawiin, Champhai District chu Mizoram a kal tawh chinah chuan fai ber ni a angaih thu a sawi a. Zuk leh hmuam chungchang pawh tarlangin zuk leh hmuam  tih nasat lutuk avangin mi tam tak chuan Cancer natna an neih phah a, Cancer kan nih tawh chuan tih theih a tam tawh lova, theih ang ang a enkawl bak tih theih a awm tawh loh avangin zuk leh hmuan kan bansan a tul a ni, a ti a. Natna kaichhawn theih HIV/AIDS pawh a hluar zel lohna turin a kai theihna kawng hrang hrangte chu kan hnualsuat a, kan tih loh ngam zel a ngai a n, a ti bawk. 

He hunah hian Dr. Zatluanga, District Medical Superintendent chuan Champhai District Hospital chu Mizoram Hospital-ah chuan a tha ber pawl a nih tawh thu  tarlangin, MLA hnenah  District Hospital mamawh pawimawh  leh District Hospital chu a hming pangai, Civil Hospital Champhai ti a thlak anih theihna tura hmalakpui turin a ngen nghal a ni.

Dr. J. Lalramchhuanga, Sr. Specialist hnen atangin Kayakalp awmzia leh intihsiakna kalpui a nih dan bakah hemi atana Champhai District Hospital   inbuatsaih dan   report ngaithlak a ni a. Dr. Thangsailova Colney, Sr. Dental Surgeon chuan lawmthu sawiin hun a khar a, tlaiah Kayakalp lawmman 2-na  lawmna ruai kil nghal a ni.