Vawiin hian Serchhip District Committee on Green Mizoram te chu an Chairman Pi Sangchhin Chinzah Bawrhsap hovin DC Committee Room ah an thukhawm a, June ni 11 a Green Mizoram Day hman dan tur an rel.

He meeting ah hian Member Secretary Pu Lalduhthlana, DFO Thenzawl chuan State Level Committee in Green Mizoram Day hman dan tur a rel tuma a thil lo rel tawh te leh Ramngaw lama Mizoram dinhmun te, kum hmasa lama Green Mizoram Day kan lo hman thin tawh dan te report a pe a.  Nikum lama Green Mizoram Day thingphun hnatlang neihna Serchhip Sport Complex chhehvela thing phunte an nun that thu leh enkawl zui zel an nih thu te a tarlang bawk. Chumi hnuah member kal khawm te hian he ni hman dan tur hi an sawiho zui a ni.

Kumin Green Mizoram Day ah hian Serchhipa sawrkar Office leh tlawmngaipawl tangrual ten Serchhip leh Thenzawl inkar kawngpui kamah chan insemin thing phu hnatlang neih ni se, Thenzawl lama sawrkar Office leh tlawmngaipawl ten 18 Holes Golf Course sak mek complex chhungah Thing phun hnatlang an nei ve thung se, tiin rel a ni a. A hawnna inkhawm tawi leh lawmman semna hi Serchhip – Thenzawl inkar kawngpui kam, Zawlpui peng zau laiah zing dar 10:00 a.m ah neih tur a ni ang a, a tel tur ten a hun taka thlen hman theuh tum nise, an ti a ni.  Kum danga an lo tih thin angin Department leh Pawl hrang hrang te chn tur ram leh an thingphun tur te, an phun zat turte chu DFO, Thenzawl  lamin an lo buaipui dawn a ni. 

Committee chuan Thing phun tur lo thlan fel leh a hungna tur lo buaipui turin Member Secretary, Pu Lalduhthlana chu a ruat nghal a. Anni hian Department leh pawl hrang hrangte chanpual tur leh an thing phun tur zat te an lo thliar fel sa dawn a ni.