No.3398/2021-2022

Aizawl, 14th December, 2021:  Children's Science Congress, 2021 pualin Khawzawl District Level Children's Science Congress vawi 2-na chu vawiin chawhma dar 10:00 khan Samagra Shiksha, Khawzawl District leh Science Teacher's Association Mizoram (STAM) bultumin Govt. Khawzawl High School-ah neih a ni a, District Level Children's Science Congress thupui atan hian  'Science for Sustainable Living' tih hman a ni.

Vawiina District Level Children's Science Congress neihah hian DPC & DEO, Khawzawl District Pi K. Lalsiamliani chuan thu sawiin, kumin Science Congress-ah hian nikum aiin zirlaite telte an tan avang leh an presentation pawhin hma a sawn hle tih sawiin, State Level-a tel tura thlan chhuahte pawh inbuatsaih chhunzawm zel turin a chah a. Nikum leh kumin Science Congress Focal thupui thlan 'Science for Sustainable Living' tih chu School naupang ten a pawimawhzia an hriatchian hle a ngai a. Tuna kan resources neih tamtak Pathianin min pekte hi kan thlah leh zelte tan kan humhalh a, kan enkawl that a pawimawh em em a, leilung leh a chhunga awmte hman tangkaia kan dimdawi a ngai hle tih a sawi a ni.

He hunah hian Judge-te aiawhin Additional D.C. Pu Lalrohlua pawhin thu sawiin, Science Congress a tel zirlaite inbuatsaihna chu fakawm a tih thu a sawi a. Nikum aiin kuminah zirlai tel ten hma an sawn zawk tih sawiin zirlaite chu inrintawkna nei thei tura an Subject thlante thiam bel a, Presentation an pek laia inchhiar emaw ngailo tura thiam bel turin a chah a. Powerpoint Presentation an pekin a entute tana hriatthiam awlsam leh en nuam tura an ziah thiam tul a tih thu a sawi bawk.

District Level Children's Science Congress vawi 2-naah hian Junior Category-ah School 2 - Govt. Middle School leh PES, Khawzawl Vengtharte an tel a, Senior Category-ah School 6 - Govt. Khawzawl High School, St. Joseph's School, PES Vengthar, Govt. Chawngtlai High School, PES Khawzawl leh Khawzawl Higher Secondary School-te telin Junior Category-ah hian Project 2 leh Senior Category-ah Project 8 a awm a ni.

Junior Category-ah Ada leh Malsawmtluangi, PES Vengthara Class VIII zirlaite Project 'Introducing and processing health mouth freshners from the local plants in Khawzawl area for replacing unhealthy Gutkha product' tih chu pakhatna niin Govt. Middle School- II a Class VIII zirlai Lalnunhlua leh Class VII zirlai Lalrinkima te Project, 'Isolation of Starch from Potato' tih chu pahnihna a ni a. Senior Category-ah Khawzawl HSS a Class XI (Science) zirlai Lalenkawli leh R. Lalsangliana te Project - 'Kitchen waste management for the production of organic manure' chu pakhatna niin Govt. Khawzawl H/S a Class X zirlai Dominic Lalhmingliana leh Lalhlimpuii te Project 'Study of organic component of different ecosystem and their influence on soil properties at Tuichangphai, Khawzawl' tih chu pahnihna a ni a, PES Vengthara Class - IX zirlai Lalpekhlui Project 'Analysis selected on traditional food practices in Khawzawl Vengthar in comparison with modern food items' tih chu pathumna a ni. Pakhatna hian Certificate + Rs.3,000/-, pahnihnain Certificate + Rs.2,000/- leh pathumnain Certificate + Rs.1,000/- an dawng a. Vawiin Science Congress lawmman pakhatna leh pahnihna dawngtute hi State Level Children's Science Congress-ah Khawzawl District aiawhin an chhuak dawn a ni.