Vawiin khan D.C Conference Hall, Mamit-ah Reang (Bru) Repatriation November 2016 a neih tura hmalakna sawihovin District Level Core Committee chu an chairman Pi Lalbiaksangi, Deputy Commissioner hovin an thukhawm.

State Level Core Committee in ruahmanna a siam ang chuan Mizoram mi Reang (Bru) tuna Tripura Transit Camp-a awm mek te, Mizoram mi leh sa ngei an ni em tih endik hna hi Identification Team ten Bru camp hrang hrang parukah ni 2nd November, 2016 atanga thawh tan tura ruahman a ni, Mizoram mi leh sa Electoral Roll a chuang ngei te hruaikir hna hi 30th November, 2016 atangin tan a ni ang.

Mamit District chhunga Reang ( Bru) hruaikir tur te hi ruahman lawk ang chuan chhungkaw 3699 niin rawn let te lo buaipui tu tur hian an chen lailawkna tur khawtinah Administrative officer(AO) te ruat fel ni tawhin heng hruaikir te hi District chhung khaw hrang hrang ah dah an ni dawn a ni.

Reang ( Bru) hruaikir hna thawh chhunga chawlh lailawkna tur hian Kanhmunah Facilitation centre siam a ni dawn a, hei bakah hian Mangkhawngdai Field Mamit ah leh Suarhliap ah te staging Area siam tura ruahmanna siam a ni bawk.

Mizoram mi leh sa ngei Reang ( Bru) hruaikir te hi kum 2 chhung free ration pek an ni dawn a, chen lailawkna tur ( Temporary shelter), Community kitchen leh senso dangte chu ngaihtuah sak an ni dawn bawk a ni.

Vawiin meeting-ah hian Reang ( Bru) hruaikir hna thawh turah Mamit District chhunga Group YMA hrang hrang te chuan mizoram mi leh sa ngei rawn let tur te chu lawm taka an lo dawnsawn tur thu leh boruak thianghlim tak hnuaia Repatriation hna kalpui an duhthu an sawi bawk a ni.

Reang (Bru) Repatriation kalpui turah hian mawhphurhna hrang hrang insiam fel niin tha taka inbuatsaihna kalpui a ni a, venhimna lamah pawh inbuatsaihna tha taka kalpui a ni bawk.

Vawiin meetingah District Level Core Committee te bakah District chhung Group YMA President te, Jt V.C, Party hrang hrang hruaitute, MZP Hqrs, Mamit te bakah Official dangte an tel a ni.