Vawiin hian Serchhip District Fire Prevention Committee chu an Chairman Pi Sangchhin Chinzah, District Bawrhsap hovin DC Meeting Room-ah an thukhawm a, kumin chhunga kangmei ven kawnga hmalak dan tur hrang hrangte an sawi ho.

State Level Fire Prevention Committee-in ruahmanna a lo siam tawh angin ni 12 February, 2018 hian Fire Prevention Week hawnna neih nise tih a ni a, a hawnna pui ber hi DC Conference Hall, Serchhipah neih a ni anga, hemi rual hian Village Level Fire Prevention Committee kaihruainain khaw tinah Fire Prevention Week hawnna hi hman nise tih a ni bawk a ni. State Level Fire Prevention Committee-in a lo ruahman tawh angin ni 15 March, 2018 hma ngei hian Lo/Huan/Leipui hal vek tura thupek tihchhuah tur ani leh dawn a. Kangmei a chhuah loh nan hian uluk taka Meilam sial turin Committee chuan mipuite a ngen a ni. Kumin a Kang mei ven thupui atan “Ram tikang lo turin mitin i fimkhur ang u” tih chu State Level Fire Prevention Committee-in a thlan thu tarlan niin, District chhungah kangmei ven kawnga thawk tha khua thlan chhuaha lawmman pek tura rel niin, a thlangtu tur pawh ruat fel nghal an ni.

Meeting-ah hian Pu Lallianzuala, DFO Thenzawl, Member Secretary, Serchhip District Fire Prevention Committee chuan kum kaltaa hmalakna sawiin, kangmei ven kawngah District 8 zinga a ti tha 3-na kan nih thu a sawi a. Khaw awm danin a zir loh avangin chhinchhiah tlak thil thleng lian tham a awm lem loh thu a sawi bawk.

He meetingah hian Serchhip SP Pu Lalringdika, MPS leh District Level Committee member te an tel a ni.