Vawiin khan Champhai District Fire Prevention Committee chu an Chairman Pu Vanlalngaihsaka IAS, Champhai DC hovin an thukhawm a, February Ni 12 atanga 17 chhunga Fire Prevention Week, 2018 hman dan leh Fire Season chhunga thilthlengte thlirletnate neih a ni a. Heng bakah hian hmachhawp dangte sawiho a ni.
Meeting-ah hian kang mei ven kawnga thawk tha khua thlan dan tur tehna hrang hrang leh District Level Fire Prevention Monitoring and Evaluation Format-te siam that anih hnuah pawm a ni a. Champhai District chhunga Lo hal dan report kimchang leh kangmei chhuah dante ngaihthlak niin, kangmei ven kawngah tun aia nasa zawka tan lak anih theihna turin VC tinte chu hriattirna lehkha pek ni se tih a ni a. Kang mei veng zo lo khuate chungah dan anga hmalak nise ti a rel a ni a. Champhai Forest Division huamchhunga Range Officer pariatte report danin kumin Lo hal avang khan tum sarih ram a kanga, hectare 138 a zau ram a kang ral a. Lo hal avang nilo, chhan hriat loh mei chhuak avangin ram tum 17 a kanga, hectare 240.7 a zau ram a kang ral bawk a ni.
Champhai District chhungah Voluntary Fire Fighting Squad 6: Farkawn Khawbung, Vaphai, Khuangthing, Bungzung leh Champhai Vengthar-ah te din a ni a. YMA Branch tina din anih ngei theihna turin Sub-Hqtrs YMA leh DFO-te tangkawpin hmalak nise tih a ni a. Kawngpui kam ram humhalh dan loa vat tlang leh ram tikangte chungah dan anga hremna lek kawh ngei nise tiin meeting chuan a rel bawk a ni. Kangmei ven hapta chhung leh kang mei chhuah tam hun laia mipuite zirtirna kawnga chanchinbumite tawiawmnaah meeting chuan lawmthu a sawi bawk a ni.
Kumin hian Champhai Forest Division huam chhungah Lo nei lo khua tam tak an awm a. Lo nei khuate pawhin Lo hal hun chhungin an hal vek hman a ni. Meeting-ah hian nikum lam ain kuminah ram kang report a tlem zawk thu tarlan a ni.
