Vawiin khan Patent Information Centre, Mizoram Science, Technology & Innovation Council (MISTIC) huaihawtin Science & Technology Conference Room-ah World Intellectual Property Day 2018 pualin hun hman a ni a. Thupui chu ‘Powering change: Women in innovation and Creativity’ tih a ni.

Chief Scientific Officer Dr. R.K. Lallianthanga chuan thu sawiin patent information centre din a nih dan leh a hnathawh hrang hrang a sawi a. Centre hi mi tam takin an chhawr tangkai mek thu sawiin, ram hmasawn zelna atan tun aia a tangkai theih a beisei thu a sawi a. Mizoram chhunga zirna in hrang hrang parukah Intellectual Property Right Cell din a nih tawh thu sawiin chungte nen chuan tang hovin hma an lak ho thin thu a sawi a. Intellectual Property dan hrang hrang hmanga mimal thiamna humhalh a pawimawh leh a tul zia a tarlang bawk.

Senior Scientific Officer Pu Samuel Lalmalsawma chuan programme hi a kaihruai a. World Intellectual Property Day hman tan dan leh Intellectual Property vawn him pawimawhna mipui hnena hrilhhriat a tul thu a sawi a. Kum 2000 atang khan World Intellectual Property Organization bultumin khawvel hmun hrang hrangah he ni hi hman tan a nih thu a sawi bawk.

Patent Information Centre Project Scientist Pu C. Laltlanzuala chuan ‘Powering change: Women in innovation and Creativity’ thupui hmangin presentation a pe a. Tun dinhmunah hian World Intellectual Property Organisation kaltlangin Biotechnology, Pharmaceuticals, Chemistry-ah patent dilna za a sawmnga zelah hmeichhiate an tel thu sawiin mizo hmeichhe scientist, science lairil lam luhchilh tak tak an tam thu a sawi a ni.