Vawiin khan RUSA hnuaia sak Govt Lawngtlai College (GLTC) administrative building thar chu Higher & Technical Education Minister Pu R. Romawia'n a hawng.

Pu R. Romawia chuan Govt Lawngtlai College-in administrative building thar tha tak an nei chu lawmawm a tih thu sawiin, Rashtriya Uchhatar Shiksha Abhiyan (RUSA) hnuaiah zirna sang zawk tihchangtlun nan hmanraw lama thuam chak (infrastructure development) lam kalpui a ni tih a sawi a. RUSA bakah NEDP hnuaiah pawh zirna tihchangtlun hna hi thawh chhoh zel tum a ni, a ti. Mihring chhawr tlaka chher chhuahna a nih avangin zirna chu ram hmasawn nana thil pawimawh ber pakhat a ni, a ti a. Mipui kan pung a, ram a pung ve si lo va, zirna leh hmanrua te tichangtlung turin zirna hmunin ram a neih sa humhalh a pawimawh a ni, a ti. 

GLTC administrative building thar hawnna inkhawm hi college Principal Pu T. Thangthuama'n a kaihruai a. He hunah hian Lawngtlai Bawrhsap Pu N. Chakhai MCS leh H&TE Joint Director Dr R. Lallianzuala te bakah, LADC EM-te leh ES te, sawrkar official leh college zirtirtute an tel.

GLTC administrative building hi RUSA Infrastructure Grant hnuai atangin Rs nuai 70 senga sak a ni a. Ft 46x20-a zau, chhawng hnih niin, a sak hna hi Lushai Engineering Pvt. Ltd chuan an thawk a. July 2016 atanga December 2016 chhungin an sa zo a ni.