District Level Global Hand Washing Day chu tukin zing dar 8:00 khan Serchhip District Education Officer huaihawtin Government Middle School New Serchhip ah hman a ni a, Pu R. Vanrengpuia, SDO (Sadar) Serchhip chuan khuallian niin a hmanpui.

Khuallian chuan thusawiin United Nations chuan Kut Silfai Ni hi a ngai pawimawh em em a, keini pawhin kan ngaihpawimawh ve a tul ani a ni a ti. Fai taka kut sil a tul zia sawiin kut silfai loh avangin natna tam tak inkaichhawn theih a ni a, Santen, kawthalo leh thawhah natna te hi kut sil fai loh avanga inkaichhawn thin niin, heng natna avang hian kum tin naupang nuai 40 chuangin an thih phah thin a, Fai taka kut sil thin nise chuan heng natna avanga thihna hi a zatve laiin a tlahniam thei a ni a ti bawk. Kumin Global Hand Washing Day thupui “Make Hand-washing a Habit” tih chu School naupangte tan chauh a ni lova, School naupangte chu midang zirtir chhawng zeltu tur an nih zawk thu sawiin an chhungte leh an thiante hnenah Kut Silfai hi nungphunga nei zel tura zirtir chhawng turin a chah a, thil ho tak leh mawlmang tak anga lang, kan hriselna leh kan nunna atana pawimawh tak ani tih hre reng turin a chah bawk.

He hunah hian Dr. Lalhlunpuii, Medical Officer, Serchhip chuan Kut sil fai pawimawhzia sawiin fai taka kut sil dan tur naupangte atakin a zirtir a. Er. Lalhruaia, Sr. Executive Engineer, PHED Serchhip WATSAN Division pawhin thusawiin kan ei tur reng reng kan kuta kan khawih hmasak zel avangin kan kut hi kan vawng fai reng tur a ni a ti bawk.

He hun hi Pu Lawmawma, District Education Officer chuan a kaihruai a, Global Hand Washing Day chu naktuk ni 15.10.2016 hi a ni a, School chawlh anih avangin vawiinah hman a nih tak thu a sawi. He hunah hian School Education Department a thawktute, Zirtirtute leh Zirlai naupang an kal tha hle a. Vawiin vek hian School hrang ten mahni remchan ang theuhin he ni hman an hmang a ni.