Vawiin khan Mamit District Level Handwashing Day 2016 chu Govt M/S-1 tualzawlah hman a ni a. Pu H. Lianzela Addl D.C chuan khuallian niin a hmanpui.
Pi Lalnunthari DEO, Mamit chuan kaihruaiin Pu H. Lianzela Addl D.C chuan hriselna tana kut silfai pawimawh zia sawiin hrisel hi hausakna a ni a ti. Global handwashing day chu kum 2008 atangin kumtin hman chhoh a ni a, India ramah Madya Pradesh chuan nikum khan khawvela a ruala kut sil tam ber niin world record an siam a, hei hi khum ve thei tura tan lak kan tum tur a ni a ti. School naupangte chu faina hriselna ngaipawimawhna chang hre tura leh hemi kawnga an rilru kaihruai theitu zirtirtu te in pawimawh a ni a ti bawk. Kut faia taka kan sil hian midang tan nilovin keimahni tan a ni tih hre thar theuh turin kalkhawmte a sawm a ni.
Dr Lalliannghaka, DMS District Hospital, Mamit pawhin thusawiin kut silfai chu hriselna atan pawimawh a nihzia leh kumin Handwashing thupui Make Handwashing Habit tih chu vawng tlat a zawm theuh turin school naupang leh zirtirtu te a sawm bawk a ni.
He hunah hian Kut fai taka sil tura thutiam Pu K. Thangkima, H.A SDEO kaihruaina in kalkhawm ten sawirualna neih a ni a, Pi Lalbiaknguri Nursing Superintendent chuan Kut fai taka sil dan tur kalkhawmte leh school naupangte zirtirna a nei bawk.
Global Handwashing Day 2016 pual hian Mamit khawpui chhunga Middle School naupangte tan Drawing leh Slogan competition buatsaih niin lawmman pakhatna atanga pathumna thleng siam a ni, Intihsiakna a lawmman dawngtute hi Pu H. Lianzela Addl D.C Khuallian chuan a hlan nghal a ni.
Global Handwashing Day hmanna hunah hian Mamit Primary School I, Govt Middle School I & II leh Hmunsam Public School tangin Naupang leh zirtirtute an tel a ni.
