Vawiin hian Serchhip Horticulture Division in District Level Horticulture Crop Exhibition, Serchhip Town Hall a a buatsaih chu Horticulture Director Pu R. Zotawna’n a hawng.

Pu R Zotawna chuan, exhibition hi Thlai leh Pangpar chingtute  inhriat tawnna leh inzir tawn nana buatsaih thin a nih thu sawiin, Serchhip chu thlai leh pangpar chi hrang hrang te tharchhuah kawngah Mizoram tana thawhhlawk thin tak an nih thu a sawi a. Hmasawn zel nan pawh hmun leh ram tha tak a nei bawk a ni, a ti. Serchhipah hian Zikhlum chauh nilo, Purunsen leh thlai dangte pawh nasa zawka tharchhuah theih a beisei thu sawiin kut hnathawktute chu taima taka beia, mamawh an neih apiangte Department lama thlen thin turin a fuih a ni.

 Exhibition hawnna inkhawm hi Pi Zosiamliani, Divisional Horticulture Officer Serchhip in kaihhruaiin, Pu Lalliankima, Joint Director, Horticulture in thusawina hun a hmang a, Pi PC Lalnghahsangi, Horticulture Extension Officer, N. Vanlaiphai chuan lawmthu sawina hun a hmang bawk.

Vawiin Serchhip  horticulture Division buatsaih District Level  Horticulture Crop Exhibitionah hi Mission For Integrated Development  of Horticulture (MIDH) hnuaia buatsaih a ni a,  Thlai leh Pangpar chingtu mi 109 ten  an thlai tharte  entirna neiin Thlai leh Pangpar chi hrang hrang  362  pho chhuah  a ni. Horticulture Department pawhin Thlai leh Pangpar chingtute mamawh chi hrang hrang  an phochhuak  bawk.

District Level Horticulture Crop Exhibition hi naktuk 3^rd February, 2017 (Fri) chawhnu Dar 1:00pm ah hian District Bawrhsap in  kharna  hun a nei ang.