Vawiin khan Lunglei Bawrhsap Pu K.Lalrohlua hovin Lunglei District Fire Prevention Committee chu DC Conference Hall ah thukhawm in Mizoram pum a February ni 6 - 11, 2017 Fire Prevention Week hman tan tur chu Lunglei District chhung ah kalpui dantur an rel.

Pu K.Lalrohlua chuan Meeting hawnna ah thu hma sawi in Mizoram District 8 zing a ti tha ber ni tur a tan lak nise Sawrkar bak ah NGO hrang hrang, Zirna in leh khawtlang mipui tangrual in kangmei chhuak lo turin kan beih a ngai a ni a ti. District Fire Prevention Committee chuan February ni 6 ah Convention Centre, Lunglei ah Fire Prevention Week hawnna zing dar 11:00 ah hman nise tih an rel a, hemi zawh ah hian mipui te chu kangmei lak a inven pawimawhna hrilh hre turin 3Gate atanga Centenary Lungphun, Pukpui thleng kawng zawh nise ti a rel a ni. Media hrang hrang in uar lehzual a Fire Prevention lam tarlan nise, hemi chungchang a ziak tha chanchinbu pathum(3) te chu thlang chhuak in lawmman siamsak nise ti a rel a ni bawk. PHE Department chuan kangmei chhuah thut ah heng hmun panga(5) Lunglawn, Chanmari, Kikawn, Serkawn leh Zotlang ah an tuizem (Tanky) te chu ti khat tha reng tura hrilh nise, Green Mizoram Day pual a kawngpui sir a thing phun zawng zawng te chu lo hal hun chhung ah an thing phun te kangmei laka a him theih nan tan la theuh se, Fire Prevention chungchang hmalakna ah Sub HQRS YMA leh VC Association nen thawh ho ngei nise tih a ni bawk. Fire Prevention Week pual in Local Cable TV leh AIR ah te Lunglei DC thuchah tihchhuah nise ti a rel a ni. Education Department hotu te leh Kohhran hrang hrang hruaitute hnen ah anmahni huam chhung ah kangmei lak a inven dan Awareness Campaign nei tur a ngen nise tih a ni bawk.

Kumin ah hian Mizoram Sawrkar chuan kangmei chhuak tur lak a invenna nasa lehzual a kalpui a tum a, kum dang ang bawkin lo hal tur te chu Khaw tin Village Council te kaltlang in March ni 15, 2017 hma in hal tura hrilh an ni vek anga, kangmei lak a invenna zawm tha khua te chu thlan chhuah ni in lawmman 1st Prize cheng sing nga, 2nd Prize cheng sing thum leh 3rd Prize cheng sing hnih pek an ni anga, he thupek bawhchhia te erawh chu dan ang in District Administration, DFO leh DLAO ten hrem dan an ngaihtuah ang. Mizoram Sawrkar chuan kumin thupui atan "Ram ti kang tu chu Ram hmelma" tih hmang in hmun hrang hrang ah banner tar tura rel a ni bawk.

Pu H.Lianmawia, DFO, Secretary Lunglei District Fire Prevention Committee ni bawk chuan kum 2016 hmalakna thenkhat tarlang in kum 2016 chhung in lo hal hmun 194 ah a awm a, ram kang zau zawng chu 807.55 Hectre a ni. Tin, Forest Fire vawi 10 a awm a 56.6 Hectre vel a zau a kang a ni. Ram kang chungchang ah FIR vawi thum theh luh a ni. Mizoram pum District Level Fire Prevention ah Lunglei chu pathumna a ni. Village Level a kangmei ven na a ti tha khua te chu 1. Lungpui Tlang, 2.Lungleng 'S'leh 3.Zotluitlang te an ni. Lunglei District ah Sawrkar thupek zawm lova lo hal tlai khua pariat an awm a, kangmei ven chungchang ah Branch YMA leh Village Council thuneitu ten nasa takin tan an la a, kum dang aiin ram kang a tlem phah a ni a ti.