Vawiin chawhnu dar 1:30 khan NLUP Conference Hall-ah District Level NLUP Monitoring Committee neih ani a, hei hi Pu H.Liansailova NLUP Nodal Minister chuan a kaihruai.
Meeting kaihruaitu Pu H.Liansailova chuan, nimin lamah NLUP Apex Board Meeting pawimawh tak neih ah, District lam hotute an kal tha in, report fel tak te an pek avangin lawmawm atih thu sawiin, NLUP hlawhtlin nana District hrang hrang hotute hnathawh chu lawmawm a tih thu a sawi.
Mizoram sorkarin NLUP mirethei leh kut hnathawk tute khai chhuahna hna a kal pui chu State dang dangin an awh thu leh tha an tih thu sawiin, Monitoring tha taka tih anih chhoh chuan rei lo te ah Zofate chu an changkang chho hle turah beisei anih thu Pu Liansailova chuan a sawi bawk.
Pu R. Selthuama, Chairman, NLUP Implementing Board(NIB) chuan thu sawiin, NLUP hmasa kum 20 kalta ah khan hma latu zingah a tel thu sawiin, tuna kan NLUP sum hmuh nen chuan in ropui hleih tak a nih thu leh uluk taka kalpui a tul thu a sawi.
Sum kan hmuhte hi chak taka kan hman chuan Central lamin min rawn pek belh zel tur thu an sawi a, mahse fapa tlanbo pawh kha instalment in pe se chuan a tlanbo kherlo tur tih ang deuhvin, sum hi a nihna taka hman anih theih nan leh hlawhtlin ngei nan uluk leh fimkhur takin sem anih thu Pu Selthuama chuan a sawi a, monitoring uluk taka kalpui a tul hle a ni a ti bawk.
Pu Zorammuana, Secretary, NIB chuan District Level Monitoring Committee tih danglam hret a awm thu sawiin, Chairman chu MLA te niin, Co-Chairman ah Deputy Commissioneer te anni a, Autonomous District Council ah erawh chuan Co-chairman ah DC te bakah CEM te an nih thu a sawi.
Pu P.L. Thanga, Vice Chairman, NIB leh Chairman, State Level Monitoring Committee chuan member kal khawmte hnenah kalphung tur leh NLUP hlawhtlin nana tan lak dan tur, Defaulter ta chung a action lak dan tur te sawi fiahna a nei bawk.
Vawiin meeting ah hian District leh Cluster hrang hranga Chairman, MLA te, Co-chairman, District Deputy Commissioneer-te leh an aiawhte bakah Prominent Citizen aiawhte leh NIB Officialte an tel a ni.
