Vawiin khan District Level On Green Mizoram, Mamit District chu an Chairman Pu K. Lalthawmmawia District Bawrhsap hovin a Office Chamber-ah an thukhawm a, kum 2014 chhunga Green Mizoram Programme hnuaia hmalakna hrang hrang thlirletna leh kum 2014 Green Mizoram Day hman tawh dan leh thingphun enkawl zui dan tur te an thlirho a ni.

Pu Lallianzuala DFO Mamit, Member Secretary-in report a pek danin kum 2012 leh 2013 khan Mamit to Bairabi Road-ah thingtiak 710 phunin uluk taka enkawl a ni a, kumin 2014 hian thingtiak 211 phun belh a ni bawk. Mamit to Bairabi Road hi Planting Agency hrang hrang, Sorkar Department, NGO, Village Council leh Zirna In te tan Plot 49 ah then a ni a, a pumpuiin thingtiak 800 chuang zet phun nun tawh a ni. District Level Committee on Green Mizoram chuan Mamit to Bairabi Road, Road Site Plantation chu District dangte tana entawntlak khawpa enkawl tum a nih thu te a tarlang a ni.

Green Mizoram Day hnuaia thingphun hunbi neia endiktu tur Monitoring Committee chu SDO (Sadar) Mamit kaihhruaina hnuaia din a ni bawk.

Committee chuan State Level Fire Prevention Committee-in Mamit District chu kang mei ven hna thawk tha ber District-a puan a nih avangin Trophy leh tangkafai thahnem tak a dawng avangin lawmthu a sawi a, kum lo thar leh zel turah pawh an lawmman lak hi humhim ngei turin tanlak an tum a ni.

Meeting chuan District Hqrs ah leh Sub-Division Hqrs tin a Green Mizoram Park neih theih dan tur ruahmanna a siam bawk a, hemi atan hian Environtment & Forest Department, V/C leh NGO te nen tangrualin Green Mizoram Park hmun tur khawpui chhung leh khawpui chhung hlat lo thei ang ber tur hmun remchang an lo dap dawn a ni.