89/2023-2024

Kolasib dated 13th April 2023: Vawiin chawhma khan DC Conference Hall, Kolasibah Family Oriented Socio Economic Development Programme Phase- II kalpui dan tur sawi hoin District level SEDP Committee chuan thutkhawmna an nei a. Pu John LT Sanga, Deputy Commissioner chuan hun kaihruaiin SEDP kalpuitu Department hrang hrang hotute leh member dangte he hun ah hian an tel a ni.

Pu John LT Sanga, Deputy Commissioner chuan Kolasib district chhung khaw hrang hranga eizawnna bultan nan leh ei leh bar a kan intodelh theih nana SEDP Phase-I kaltlanga hmalakna tha tak a kalpui a ni chu lawmawm a tih thu sawiin Phase-II kalpui chhunzawm leh tur a nih thu a sawi a. SEPD hnuai a hamthatna dawngtuten eizawnna rintlak an neih theih nan Department hrang hranga thawktuten uluk tak a an vilpui thin a pawimawh thu a sawi.

Pi Lalruatpuii, SDC, Nodal Officer, SEDP chuan Phase-II kalpui chhunzawmna tur hian Assembly Constituency pakhat atangin mi 1400 zel thlan chhuah tur a nih thu leh Phase-I a hamthatna dawng tawh te pawhin tanpuina an dawn chhunzawm tur thu a sawi a. Hmalakna felfai leh sawt zawk a awm theih nan Phase-II a tel turte hming chu ni 21, April 2023 ral hmaa thehlut turin leh chung lehkha thehluh te chu DC pisaah Computer hmangin Online-a ziahluh leh vek tur a nih thu a sawi.

Family Oriented SEDP hi District Agriculture Office, Horticulture, Fisheries, Urban Development & Poverty Alleviation, Commerce & Industries, Veterinary, Land Resources, Soil & Water Conservation leh Sericulture Office hnuai ahte kalpui a ni a. Kolasib district-ah hian mi 4200 thlanchhuah tur niin Phase-II kalpui chhung hian eizawnna bultanna tur tanpuina cheng 25,000 tum hnih an dawng dawn a ni.