Vawiin khan DRDA Conference Hall, New Secretariat Complex-ah Aizawl District huamchhung viltu District Level Vigilance and Monitoring Committee chu Co-Chairman Rajya Sabha MP Pu Lalhmingliana kaihhruaiin an thukhawm.

He meeting-ah hian Aizawl District huam chhunga District Level Rural Development Agency hnuaia Scheme hrang hrang Mahatma Gandhi National Rural Employment Guarantee Scheme (MGNREGS), Indira Awaas Yojana (IAY), Swarnjayanti Gram Swarozgar Yojana (SGSY), Integrated Watershed Development Programme (IWDP), Rajiv Gandhi Gram Vidyatikaran Yojana (RGGVY), Pradhan Mantri Gram Sadak Yojana (PMGSY), Accelerated Rural Water Supply Programme (ARWSP), National Rural Health Mission (NRHM), National Social Assistance Programme  (NSAP) leh Total Sanitation Campaign (TSC) hnuaia hna thawh kalpui dan thlirho a ni a. Scheme kalpuitu Department hrang hrang aiawh ten an hmalak dan report pein chak leh zual a hnathawh dan tur ngaihtuahho a ni.

MGNREGS ah hian 2010-2011 chhung khan Aizawl District huam chhungah Job Card holder chhungkaw 2,4468 an awm a, 2011 - 2012 kum kal mekah hian Job Card  holder chhungkaw 2,5512 an awm thung. Chhungkaw 2,5512 te tana kumin chhunga ni 100 inhlawhna siamsak tur hian sum mamawh zawng zawng cheng nuai 5814.16 a nih laiin Central sorkarin cheng nuai 3215.7 a pawmpui a. Sum mamawh sorkar laipui lamin a tihhniam tak nachhan hi Internet chak tawk loh avanga Data Entry a hun taka an tih theih loh vang a nih thu meeting-ah hian tarlan a ni.  SGSY hnuaia din Self Help Group chungchang sawiin an harsatna lian ber chu Bank atanga sum an puk Interest sang lutuk a nih thu tarlan a ni a. Bank enkawltute nena thawhhona tha zawk an neih theih nan a tul anga inbiak leh sawihopui nise an ti a ni. Thingtlang khua tihenna tur RGGVY leh PMGSY hnuaia thingtlang khaw inkalpawhna kawng sial chungchangah belhchiandawl taka hna kalpui a nih theih nan a kengkawhtu Department ten vil leh endik kawngah chak leh zuala hmalak nise an ti bawk.

He meeting-ah hian Lok Sabha MP Pu C.L.Ruala, Deputy Speaker Pu John Rotluangliana, Parliamentary Secretary Pu Chawngtinthanga leh Pu KS Thanga, Law Commission Chairman Pu R. Lalrinawma bakah Aizawl DC Pu Shurbir Singh leh mipawimawh dang engemawzat an tel a ni.