Vawiin khan Lawngtlai DC Conference Hall-ah Lawngtlai District Vigilance and Monitoring Committee neih a ni a, Chairman Pu CL Ruala, MP Lok Sabha leh Co-Chairman Pu Ronald Sapa Tlau, MP Rajya Sabha ten he Meeting hi an kaihruai.

Pu C.L. Ruala chuan, Lawngtlai District in hma a sawn theihna atana thawktute in nih hre rengin an hnathawhah a tha ber thlen tum thin turin a chah a. Chutiang mi chu kan ram hian a mamawh a ni a ti. Co- Chairman Pu Ronald Sapa Tlau pawhin sawrkar Department hrang hrangte hmasawnna hnathawh chu mipuiten venpuiin ngaihven se a duh thu a tar lang bawk.

Vawiina Vigilance & Monitoring Committee thukhawm hian Lawngtlai District chhunga hmasawnna hnathawh kal lai pawimawh tak takte chu Agenda 13 ah thliar hrangin an enfiah a. Chungte chu National Rural Drinking Water Programme leh Nirmal Bharat Abhiyan, PHE Department thawh te, Pradhan Mantri Gram Sodak Yojana (PMGSY) PWD Department thawhte, Rajiv Gandhi Grameen Vidyatikaran Yojana (RGGVY), P&E Department thawhte, Natioanal Social Assistance Programme, CADC leh LADC a Social Welfare Department thawhte, Health Department hnathawh hrang hrangte, Education Department hnuaia Ashram School leh Hostel sak mek te, Rural Development hnuaia hnathawh hrang hrang te leh Backward Region Grant Fund hnuaia hnathawh hrang hrangte an ni hlawm.

He meeting-ah hian Lawngtlai District chhunga atanga Member of Legislative Assembly ni lai pathum, Minister of State pahnih Pu C. Ngunlianchunga leh Dr. Buddha Dhan Chakma, Parliamentary Secretary Pu H. Zothangliana te an tel a. LADC CEM Pu V. Zirsanga bakah Addl. DC Pu R. Lalsangluaia leh Member Department hrang hrang aiawh Officer te an tel bawk a ni.