Nimin khan Saiha District DC’s Conference Hall-ah District Vigilance & Monitoring Committee neih a ni. He Meeting hi Pu C.L. Ruala,MP(LS), Chairman DLV&MC leh Co- Chairman Pu Ronald Sapa Tlau, MP(RS) ten an kaihhruai a, Pu Hiphei Speaker, Mizoram Legislative Assembly leh Palak Bialtu M.L.A. nibawk te leh Pu RT Zachono, CEM, MADC ten an telpui a ni.

DLV&MC meeting-ah hian CSS( Centrally Sponsored Scheme) implementing Department hrang hrang ten 2014-2015-a 3rd Quarter ( 1st October - 31st December) chhunga an hnathawh leh hmalakna hrang hrangte ennawn a thlirho a ni a. Department hrang hrangte an hnathawhna kawnga harsatna an tawh te chu MP pahnih te hnenah hian thlenin, huam zau takin an hmachhawp leh hmalak zel dan turte pawh an sawi ho a ni. DLV&MC Chairman leh Co-Chairman te chuan Official kalkhawmte chu CSS hmanga hna an thawhna reng rengah, ram leh khawtlang tan rotling thil hnuhchhiah tum ngei turin, taimakna leh rinawmna nena thawk thin turin an chah hlawm a ni.

Meeting-ah hian Medical department chuan IMR leh MMR-ah Saiha District chuan 2nd quarter atangin 3rd quarter-ah hmasawnna em em a awm loh thu an report a. P&E Department chuan 2nd Quarter atanga RGGVY Scheme hnuaia hnathawhah hmasawnna nasa tak an neih thu an report a, Saiha District-a Thingtlang khua 7-a hnathawh mek hi zawh fel a nih hun chuan Saiha District chhunga thingtlang khua zawng zawng-ah Electrict tih en vek a nih tawh tur thu meeting an hrilh ani. DRDA chuan Saiha District-a Job Card nei chhungkua 13530 hnenah ni 8 inhlawhna an pek theih thu tarlangin, CSS hnuaia Scheme hrang hrang, heng: IAY,BADP,IWMP etc. a an hmalakna te report an pe bawk.

PWD Department chuan PMGSY hnuaia an hmalakna report pein, Kawlchaw-Serkawr Road leh Siachangkawn-Vawmbuk Road chu Contractor ten an thawh that loh avanga, an Contract tihtawp sak a nih thu leh Re-Tender leh tur anih thu an tarlang. Social Welfare Department chuan Scheme 5 heng: IGNOAPS(above 80 Years),IGNOAPS,IGNWPS,IGNDPS leh NFBS hnuaia ansum hmuh dan report an pe a, National Family Benefit Scheme (NFBS) bikah chuan 2014-2015 chhungin fund an hmuh loh thu te, Indira Gandhi National Widow Pension Scheme(IGNWPS) hi February 2014 thleng chauh fund an lak dawn thu te an tar lang bawk a ni. Vawiin Meeting-ah hian BADP hnuaia Contract hmu tu ten thawk lovin, an hralh chhawng thin tih thu te sawilan a ni.

He Meeting ah hian Saiha khawpui chhunga Department hrang hrang hotute, tlawmngai pawl hrang hrang hruaitute leh Chanchinthar thehdarh tute an tel tha hle a ni.