Ministry of Rural Development-in rambua tawh cheithar leh nana a hmalakna pawimawh tak Integrated Watershed Management Programme (IWMP) hnuaia ‘District Level Training for Watershed Development Team’ chu vawiin khan Lunglei Addl. DC Pu Lalhmachhuana-in SIRD Extension Training Centre, Pukpui-ah a hawng. He Training-ah hian Lunglei, Saiha, Lawngtlai leh Serchhip atangin Watershed Development Team thlanchhuah ten ni 5 chhung ram cheibawl that leh dan tur an zir dawn a ni.

Training hawnna inkhawm SIRD Extension Training Centre Principal Pu KT Pakhuangte kaihhruaiah Addl. DC Pu Lalhmachhuana chuan mihring pung chho zel leh khawsakna avangin ram kan tichereu telh telh a, kan ram neih chhun ang ang hi duat taka kan cheibawl loh chuan kan tu leh fate tan chenna tlak lovah kan siam thuai dawn a, chuvangin kan ram neih chhun ang ang chu hmantlaka siam hi kan tih makmawh a ni, a ti. Rambua tawh chei thar lehna Wasteland Development Pragramme chi hrang hrang hi tunhma atangin ruahman a ni tawh a, a tum bulpui ber chu ram chhia leh hman tlak tawh loh te cheithat a, chung cheithat nana man tlawm zawk si, hmuh leh hman mai thei hmanrua chi hrang hrangte hmanga, leilung hangtha kal ral tur leh tui luangral mai mai tur tangkai zawka hman a ni a. Wasteland Development hian ‘afforestation’ (ram tih ngaw thar lehna) pawh a keng tel a, a ramchhunga chengte ngei thawh tur niin an nundan, ei leh bar zawn dante a tihmasawn ngei tura beisei a ni bawk, a ti.

India ramah hian ram hmantlak loh Tin maktaduai 204 zet awm anga chhut a ni a, chung zinga Tin maktaduai 102 zet hi a nihdan tur anga enkawl chuan ram hmantlakah siam theih ai a ni a. Rampumah ram hman tlak tawh lova siamtu lian ber chu tuilian (61.52%) a ni a, a dawttu chu ramngaw suat (11.20%) niin, thingtlang lo neih (shifting cultivation) avangin kum tin 2.82% lai a ni. Sorkar lam chhinchhiah danin rambua tawh cheithar lehna programme chi hrang hrang hmangin Tin maktaduai 114 vel siamthat leh theih beisei a ni. Rambua cheithat leh nan kum 1972 atangin Ministry of Rural Developent-in kawng hrang hrangin hma a lak tawh mai bakah Ministry of Environment & Forests pawhin kum 1989 atang khan ‘National Afforestation & Eco-development Project’ hming vuahin hetiang programme hi a lo kalpui ve tawh thin a ni.

National Remote Sensing Agency-in ‘Wastelands Atlas of India(2005)’ a tarlan danah chuan Mizoram zau zawng 21,081 SqKms-ah hian 4,469.88 SqKms zet chu rambua a ni a, chu chu zaa 21.20% lai a tling a ni. Hei hi kum tina lo vah leh hal chin avanga ram tihchhiat thinin a siam a ni. Mizoram-ah hian 2001 Guidelines anga kal ‘Integrated Watershed Development Programe’ Project 17 leh 2003 Guidelines anga kal ‘Hariyali Project’ 35 (a zavaiin Project 52) kalpui mek a ni a. Kum 2008 atanga rampum tana Common Guidelines siam hnuaiah Mizoram-ah pawh ‘Integrated Watershed Management Programme’ (IWMP) chu kum 2009-10 atanga hmalak tan niin Project 95 kalpui mek a ni bawk. Hei hian a tum ber chu ram leilung hangtha luangral tur ven te, tui renchem leh hman tangkai te, ei leh bar tharchhuak tura hmalak te, sik leh sa inchawih tawk neih theihna tura hmalak te, khawtlang hruaitute kuta thuneihna tam zawk pek a, anmahni kaltlanga thingtlang khua tih changkan te bakah mipui leh sorkar inkara langtlang taka hnathawh kalpui leh thawhhona tha siam te a ni.