Vawiin khan Lawngtlai DC Conference Hall-ah Minister of State for AH&Vety, etc., Pu C. Ngunlianchunga chuan Lawngtlai District chhunga Head of Department te ko khawmin District hmasawnna tura a ngaihdan te hrilhin an harsatna te a ngaihthlak sak.
Thu sawiin Minister chuan Lawngtlai District hi Backward Region Grant Fund (BGRF) hmu pha khawpa hnuaihnung a la ni a, chutih laiin hun rei tak atang tawh khan hmasawnna thawhna tur sum hmu tam ber pawl a ni reng thin a ni. Sum hmu tam pawl ni reng chung si a, District hnufual ber pawl a la ni reng hi ngaihtuah a ti thui a, hmasawnna hna thawktu Department hrang hrang ten ngaihtuahna thar kan hman a tul hle tawh a ni. Hei vang hian tun atang chuan ruahmanna thar leh inpekna thar nen hma lakpuiah ka sawm che u a, kum nga a ral leh chuan BRGF sum mamawh tawh lo District ah in hlankai kan tum tur a ni, tiin a chah a. Kan District hi zirna lamah kan la hnufual avangin kan mipui tam tak ten an mahni tana tha tur pawh an ngaihtuah thiam vek lova, chung mipuite finchhuah a an tana tha tur ruahmanna siam sak lamah nasa takin hma la turin Department tin te ka ngen a ni a ti a, District Council lam nena inpawh tlang taka kawng tinrengah thawk ho thin turin a chah bawk.
Minister hian hna tha thawk turin huaisen kan mamawh a, dodalna te pawh tawh chang a awm thin. Chutiang thil in lo tawk palh a nih chuan min rawn hriattir thin turin ka ngen che u a, thawk lo na na na chu sum pawh pe lo ngam turin ka duh che u a ni tiin a sawi bawk.
Hemi hnu hian Department hrang hrang te chuan an harsatna neih ang ang te Minister hnenah hian an thlen nghal a, chung an harsatna te chu ziaka a hnenah thlen turin Minister hian a hrilh hlawm a ni.
He hunah Chairman Bawrhsap Pu J. Hmingthanmawia pawh in thu sawiin kum khat chauh a awm chhungin inthlanna vawi li zet buaipui hman a ni a, chung inthlan ah te Department hrang hrang a thawktu ten tha tak a an tawiawm avangin lawmthu a sawi a, hmasawnna hna thawhna kawngah pawh Department hrang hrang te thawhhona tha tak nei tura hma la thin turin a ngen a ni.
He hunah hian Lawngtlai District chhunga Department hrang hrang Officer mi 33 an tel a ni.
