Kumin March ni 3-ah sorkar laipuiin Mizoram Medical College din phalna a pek tak avangin Mizoram sorkar chuan theihtawp chhuahin a bawhzui nghal a. Committee peng hrang engemawzat a din zinga peng pawimawh tak pakhat Advisory Committee chu an Chairman Pu Lal Thanzara, Health Minister hovin vawiin chawhnu khan Chief Minister’s Office Conference Hall-ah meeting hmasa ber an nei. He Committee Vice Chairman Pu RL Rinawma, Principal Secretary, Health & FW leh member dangte -Dr. K Beichhua, MLA; Dr Lalthanpuii Hnamte; Dr.NK Mohanty, Adviser to Govt.of Mizoram; Dr K.Ropari, Principal Director, Health & FW; Dr Biakkima, Director, Hospital & Medical Education, Dr Rohmingthanga Ralte, Director, Health Services; Dr Lalbiakzuala Joint Secretary (Tech) leh Pu R.Lalchhanhima, Deputy Secretary Health & FW te an tel kim a ni.He Advisory Committee hi Medical College project atana Committee peng hrang hrang dinte khalh kaltu tur leh an hnathawh dan tur kawhhmuha finchhuahtu tur an ni.
Health Minister chuan hun rei tawh tak ata sorkarin neih ngei tuma a lo beih tawh Mizoram Medical College chu a tak ram a thlen dawn tak avangin theihtawpa a buaipuitu ten tan an lak a ngai a, Medical Council of India (MCI) mit tlung a hnathawh a tul avangin Committee peng hrang hrangte pawhin anmahni hmazawn theuha tihtur awmte bahlah lova an tih zar zar a ngai a ni, a ti. Pu Lal Thanzara chuan medicine thiamna lama tawnhriat ngah leh mi hmingtha, Director General of Health Services, Govt. of India hial lo ni tawh Dr NK Mohanty chuan Mizoram Medical College puitlin nana kawng tinrenga puih a inhuam avangin lawmawm a tih thu meeting-ah hian a sawi lang bawk. Medical College dinna tur Committee peng pawimawh tam zawkah Dr.Mohanty hi a tel a ni.
Meeting-ah hian Medical College dinna tur Falkawna State Referral Hospital hlimthla thlir ho niin ruhrel siam that ngai leh thawm that ngai laite sawiho a ni a. August, 2015 ah Class tan hman theih beisei niin a bul tan nan Anatomy, Biochemistry leh Physiology Department din nise, a batch hmasa berah zirlai 100 tal admit theih tum nise tih a rel a, chu chu Chief Minister chairman-na hnuaia din Board of Management hmaah pharh a ni ang.
He project atana rawih tur Consultancy Firm thlan chungchang ngaihtuahho a ni a. Health Department Principal Secretary kaihhruaina hnuaia din Committee in uluk taka a ngaihtuah hnua a rawt, HSCC (India) Ltd. chu Advisory Committee hian a pawmpui a. Sorkar laipui Ministry of Health and Family Welfare hnuaia public sector company HSCC hian ram chhung hmun hrang hrangah medical college leh hospital-te engemawzat an lo sa tawh a ni.
MCI phalna a rang thei ang bera lak a nih theih nan Dr N.K. Mohanty kaihruaina hnuaiah a bawhzui tur team din chu Committee hian tha a ti a. Member atan Dr.Eric Zomawia, Dr John Zohmingthanga leh Dr Hmingthankimi, New Delhi te chu ruat an ni. Hei bakah hian Medical College chungchanga mipui hriatduh leh media-te hnena puanzar tur tul awm apiang buaipuitu tur team din a ni bawk a. Principal Secretary, Health kaihhruaina hnuaiah Dr Eric Zomawia, Dr T.Lalhmangaihi, Dr Jane Ralte, Health Dy.Secretary Pu R.Lalchhanhima leh Dr. Pachuau Lalmalsawma te chu member-ah ruat an ni.
