No.3430/2021-2022
Aizawl 16th Dec, 2021 : Vawiin khan DC Conference Hall, Mamit-ah Dr. Lalrozama, IAS District Bawrhsap hovin District Task Force on Covid - 19 Vaccination Mamit District thutkhawm a ni a. Covid 19 Vaccine Mamit District chhunga pekchhuah a nih tawh dan thlirhona neih a ni.

Meeting kaihruaitu District Bawrhsap chuan Covid - 19 Vaccine chu Mamit District mipuite'n duh aia kan la lak that tawk loh thu a sawi a. In tina kal a, Vaccine laktirna Har Ghar Dastak Abhyan chu kumin 31 December, 2021 thleng kalpui tur a nih thu a sawi.

Meeting-ah hian Har Ghar Dastak Abhyan hnuaia hmalak dan tur sawiho nghal niin District chhung khaw thenkhata Vaccine la tha lo zual khua tarlan te chu kumin chhung ngeia an khua-ah kalchilha zirtirna nei tura tih niin CMO Office chuan ruahmanna lo siam nghal se tih a ni.

Mamit District chhungah Target 59397-ah vaccine 1st dose 77.6% leh 2nd dose 57% pek an ni tawh a. Mamit District chhung atangin mi 55510 te'n (57.261%) Covid an vei leh veiloh test an paltlang tawh a. Covid positive tawh zawng zawng zat hi 5537 niin mi 14 Covid vanga nunna chan an awm tawh bawk a ni.

Covid-19 laka kan him theihna tura Vaccine la thei chin te'n kim taka kan lak theihna turin Sorkar Department, tlawmngaipawl, khawtlang hruaitu leh Kohhran hote thawhho dan tur Meeting-ah hian sawiho zui nghal a ni bawk.

Vawiin thutkhawmah hian District Task Force on Covid-19 Vaccination Members te an tel tha hle a ni.