‘National Rural Drinking Water & Sanitation Week’ hmalakna kal mekah vawiin khan Lunglei Addl. DC Pu Rothuama hovin District Water & Sanitation Mission Committee (DWSMC) member-te chuan Lunglei leh a chhehvel chawmtu tui lakna Pialthleng a hmunah an enfiah.

DWSMC hotu Addl. DC Pu Rothuama chuan Lunglei leh a chhehvelah PHED hnuaiah tui connection neitu mi 57011 an awm mek a, tuna tui khawl theihin a chawm zo tawh mang lova, khua a thal chho zel avangin tui pawh a tlem tial tial a, duhkhawpa tui pump tur leh sem tur pawh a awm tawh meuh loh thu a sawi a. Chhungkaw tin ten tui ren taka an hman thiam a pawimawh thu sawiin a tul a nih chuan ‘emergency water supply’ tur pawh ngaihtuah chhoh a ngai mai thei a ni, a ti. Tui renchem chungchangah sorkar hmalakna thlawp turin NGO, media leh mipui zawng zawng a sawm a ni.

SE PHED Lunglei Er.H.Duhkima chuan member-te tui lakna hmun hi a fan kualpui a, tuia harsatna tawh hrang hrang sawiin kumin February thla atangin Tlawng lui leh Pialthleng lui tui chu mumal taka teh tan a ni a, tui hna hian nitin hniam lam a pan zel avangin duhkhawp pump chhuah a harsa tawh hle tih a hrilh. Tui pump chhuahna khawl hian darkar khatah litre 3,80,000 a pump theih laiin Tlawng lui hian tun dinhmunah darkar khatah litre 1,80,000 chauh pump tur a nei tawh a, tui khuahnaah hian rei tak tak nghah khawl a ngai tawh a ni, a ti.

PHED-in February 2015 thla tir atanga tui awmzat an tehna chu a hnuaia mi ang hi a ni :

Teh ni -Tlawng -Pialthleng

February 5 - 589000 litres/hour - 0 litres/hour

February 9 - 450000 litres/hour - 0 litres/hour

February 16 - 432000 litres/hour - 14000 litres/hour

March 2 - 295000 litres/hour - 16000 litres/hour

March 9 - 249000 litres/hour - 8000 litres/hour

March 16 - 225000 litres/hour - 8000 litres/hour

March 17 - 180000 litres/hour - 0 litres/hour

March 18 - 180000 litres/hour - 0 litres/hour

Khua a thal zel a nih chuan PHED-in a chhut danin tui tlem chhoh dan tur chu hetiang hi a ni :

Teh ni - Tlawng

March 23 - 180000 litres/hour

March 30 - 140000 litres/hour

April 6 - 110000 litres/hour

April 13 - 70000 litres/hour

April 20 - 30000 litres/hour