Pu H. Rohluna, School Education Minister chuan vawiin khan Aizawl khaw chhunga Middle School 49 te hnenah Science Kit a sem chhuak.Semna inkhawm hi SCERT Conference Hall-ah neih niin Pu Joseph Lalhimpuia, Parliamentary Secretary chu Khual zahawm a ni.

Pu H. Rohluna chuan Science Kit a sem chhuah hian Science zirtirna lamah zirlaiten hma an sawn ngei a beisei thu sawiin quality education tih hlawhtling tur chuan School a zirtirtute hi an pawimawh ber avangin inpekna thar leh ngaihtuahna thar nen naupangte zirtir turin a chah.Minister chuan Mizoram sorkar in Education Reforms Commission a din leh chumi tih hlawhtlin tura a din Task Force te rawtna tih hlawhtlin nan SCERT Mizoram chuan Middle School ah Science Practical a taka tih a nih theihna turin Science Kit pek ni se tih chu lawmawm a tih thu a sawi a.

School tan hun chungchang sawiin Minister chuan ram leh hnam tana hmasawnna turah hma thar kan lak zel a ngai a ni tiin school tan hma pawh hi tih chhoh zel a ni ang a, naupangah rah tha a chhuah ngei theihna turin zirtirtute pawhin naupang hma ngai taka tan an lak a ngaih thu leh chumi atana theihtawp chhuah turin a a sawm nghal a ni.

Pu Joseph Lalhimpuia chuan Middle School zirtirtu lakna tur atana kaihruaitu tur Recruitment Rules thar tha taka duan chhuah a ni tawh chu lawmawm a tih thu sawiin zirna leh a kaihhnawih peng hrang hrang ah a thawktute lungrual taka ke an pen thin chu lawmawm a tiin chhawm nung zel turin a chah.

Inkhawm hi Pi Malsawmthangi Director, SCERT in a kaihruai a, Pu F. Lalliansanga, Science Consultant, SCERT in Technical Report a pe a. Science Kit hi Mizoram a sorkar school zawng zawng ah sem tura ruahman a ni a, kumin hian school 300 hnenah pek phawt a ni ang. Science Kit hi zirlaibu mil tur leh naupang tana him tur te ngaihtuah chhungin buatsaih a ni a, thil chi hrang hrang 44 a awm a ni.