Nehru Yuva Kendra huaihawtin District Youth Convention 2011 chu vawiin khan I&PR Auditorium-ah Mizoram-a Youth Club hrang hrang te tan neih a ni a. Mizoram Rajya Sabha MP Pu Lalhmingliana’n a hmanpui a ni.

Convention hi Nehru Yuva Kendra Aizawl Youth Coordinator hmasa ber Pu C. Vulluaia’n a kaihruai a. Rajya Sabha MP chuan Mizote nunphungah vawiin thlenga tar at sawi tur la awm a ngaimawh thu tarlangin hnam upa leh fing zawk te zingah kum upat avanga at a awm ngai lova, Mizo zingah chuan kum upa tawh deuh te chu tunlai khawvel thu kallam hawlam hrethiam ve tawh lo turah dahin a tur hrim hrimah kan ngai a, hei hi bansan a hun tawh a ni, a ti. Pu Lalhmingliana chuan tunlai Mizo thalaite zingah hnathawhna chang hre lo, zan rei tak tak meng a, zing thawh lehna chang hre bawk si lo, mahni nunkhua thlir thiam lo, rual elna chang pawh hre lova teihawi mai mai tam ta lutuk chu engtia tih reh tur nge tia ngaihtuahna hman a hun tak zet tawh a ni, a ti a. Heng kan thalai hmakhawthlir nei thui lote hi nu leh paten kan kep zo ta lutuk nge kawng dikah hruai turin zirtirna an tlachham tih chu zawhna awm thei tak a nih avangin sawihona leh inrawn zauna hun buatsaih nise a duh thu a sawichhuak a. Mizote hi hnam taima, hlawkna turah chuan thawh hreh nei lo kan nih thin te hi tunlai thangtharte hian nunpui thar leh thei se, Zoram leh a mipui dinchhuahna tur a ni ngei ang, MP chuan a ti.

Vawiin Convention-ah hian thalaite fuihna hawia thupui chi hrang hrangah Pu Raj Kumar Joshi, DYC, NYK, Aizawl; Pi Lalthlamuani, Lecturer, Hindi Training College; Pu Kim Sang Soo, Director, Agape Social Centre; Pi Liansangluri, Social Activist leh Pu Darchuailova, Associate Professor, HBC ten thu an sawi a. Inhmelhriattirna hun Pu S.G.Singh-in changin Pu Vumzakap, AO, NYKS, Aizawl-in lawmthu sawinain hun hnung a khar a ni.