Vawiin chawhma dar 11.00 khan Social Welfare Minister Pu PC Lalthanliana chuan Khatla South MHIP Building ‘Darsiami Run’ chu a hawng. He building hi Pu Ralkhuma te chhungkuain an chhungkaw nu Pi Darsiami, 13.5.2010 a thi hriatrengna atana an sak a ni.

Pu PC Lalthanliana chuan, “Min thihsan tawhte hriatrengna siam hi thil harsa tak a ni a; anmahni hriatrengna atana kan thiltih ropui lam ai chuan kan tih chhan rilru hi a ropui zawk a. Pu Rualkhuma te chhungkaw thiltih hian khawtlangah inlungrualna leh thil tha tih duhna rilru a siam ngei ang” a ti. Social Welfare Minister chuan Mizoram-ah mahni pawl leh mimal hamthatna ringawt ngaihtuaha NGO ding an tam chu a ngaihmawh thu sawiin, “NGO tam takte chu khawtlang leh ramin kan chhawr a, sawrkar kut tichaktute an nih lain pawl thenkhatte chu tlawmngaihna hmaikawra hmanga mahni tanghma hai an ni a. Mahni sahmim tihpuar ringawt ngaihtuah a, ram leh mipuite rawngbawlna lama tha thawh peih si lo nun hi kan bansan a hun tak meuh a ni” a ti bawk.

Khatla South MHIP Building hming put chhan Pi Darsiami hi an President hlui a ni a; Khatla South thlanmual thar nghaktu hmasa ber nih hreh avanga hun rei tak thlanmual thara inphum duh an awm loh laiin Pi Darsiami hi thlanmual thara phum hmasak ber a ni nghe nghe. Darsiami Run sakna atan hian Pu Vanlalzawma MP (LS) chuan a hun lain Rs 30,000 a pe a; Pu Lalhmingliana MP (RS) chuan Rs 1,20,000 a pe bawk a; hemi baka senso dang Rs 10,00,000 zet chu Pu Rualkhuma te chhungkua hian an tumsak a ni. Hemi bakah hian Khatla S MHIP Branch chuan an pawl pawisa Rs 2,55,000 an seng bawk a ni.

Vawiina Darsiami Run hawnna inkhawm hi Khatla S YMA Hall-ah neih a ni a; building hawnnaah hian New Atlantis School, Khatla South chuan rimawiin kalkhawmte an awi a. Pu PC Lalthanliana hi bialtu MLA Pu Selthuama leh Pu Lalrimawia, AMC Councillor te chuan an tawiawm a ni.